Anjali Menon movie Wonder Women: പ്രഖ്യാപനം മുതല്‍ പ്രേക്ഷകര്‍ വളരെ ആകാംക്ഷയോടെ കാത്തിരിക്കുന്ന അഞ്ജലി മേനോന്‍ ചിത്രമാണ് 'വണ്ടര്‍ വുമണ്‍'. വളരെ വ്യത്യസ്‌തമായ രീതിയിലായിരുന്നു ചിത്ര പ്രഖ്യാപനം. സിനിമയുടെ പ്രൊമോഷന്‍ രീതിയും വളരെ വ്യത്യസ്‌തമായിരുന്നു. 'വണ്ടര്‍ വുമണ്‍' എന്ന് പേരിട്ടിരിക്കുന്ന ചിത്രത്തിലെ അഭിനേതാക്കളുടെ സോഷ്യല്‍ മീഡിയ പേജുകളിലൂടെ പ്രഗ്നന്സി ടെസ്റ്റ് കിറ്റ് പങ്കുവച്ചു കൊണ്ടുള്ളതായിരുന്നു സിനിമയുടെ പ്രമോഷന്‍.
Wonder Women promotions: പാര്‍വതി തിരുവോത്ത്, നിത്യ മേനന്‍, സയനോര ഫിലിപ്പ് തുടങ്ങിയവരുടെ പേജുകളില്‍ പ്രഗ്നന്സി ടെസ്റ്റ് പോസ്‌റ്റ് പ്രത്യക്ഷമായതോടെ നാനാ ഭാഗത്ത് നിന്നും കമന്‍റുകള്‍ ഒഴുകിയെത്തിരുന്നു. താരങ്ങള്‍ ഗര്‍ഭിണികളാണെന്ന തരത്തിലും വാര്‍ത്തകള്‍ പ്രചരിച്ചു. ചില സദാചാര കമന്‍റുകളും പ്രത്യക്ഷമായിരുന്നു. ഇതിന് പിന്നാലെ സിനിമയുടെ ഔദ്യോഗിക പ്രഖ്യാപനവുമായി സംവിധായിക അഞ്ജലി മേനോനും രംഗത്തെത്തി.
Wonder Women trailer: 'വണ്ടര്‍ വുമണ്‍' ട്രെയിലര്‍ അണിയറപ്രവര്‍ത്തകര്‍ പുറത്തുവിട്ടു. അഞ്ജലി മേനോന്‍ തന്‍റെ ഇന്‍സ്‌റ്റഗ്രാം പേജിലൂടെ ട്രെയിലര്‍ പുറത്തുവിടുകയായിരുന്നു. ആറ് ഗര്‍ഭിണികളുടെ കഥയാണ് ചിത്രം പറയുന്നത് എന്നാണ് ട്രെയിലര്‍ നല്‍കുന്ന സൂചന. പ്രസവത്തിന് മുന്നോടിയായുള്ള ഗര്‍ഭകാല നിര്‍ദേശങ്ങള്‍ ലഭിക്കുന്ന ക്ലാസിനായി പല പശ്ചാത്തലത്തിലുള്ള പല ദേശങ്ങളിലുള്ള ആറ് ഗര്‍ഭിണികള്‍ ഒരിടത്ത് ഒന്നിക്കുന്നതും തുടര്‍ന്നുള്ള സംഭവവികാസങ്ങളുമാണ് 'വണ്ടര്‍ വുമണ്‍' പറയുന്നത്.
Wonder Women trailer highlights: പാര്‍വതി തിരുവോത്ത്, നിത്യ മേനന്‍, പത്മപ്രിയ, സയനോര ഫിലിപ്പ്, അര്‍ച്ചന പത്മിനി, അമൃത സുഭാഷ്‌ എന്നിവരാണ്‌ ഗര്‍ഭിണികളുടെ കഥാപാത്രങ്ങളെ അവതരിപ്പിക്കുന്നത്. നാദിയ മൊയ്‌തുവും സുപ്രധാന വേഷത്തിലെത്തുന്നുണ്ട്. ഗര്‍ഭിണികള്‍ക്ക് പ്രീ-നേറ്റല്‍ ക്ലാസ് എടുക്കുന്ന വ്യക്തിയുടെ റോളിലാണ് ചിത്രത്തില്‍ നാദിയ മൊയ്‌തു പ്രത്യക്ഷപ്പെടുന്നത്.