തമിഴ് യുവതാരനിരയില്‍ ശ്രദ്ധേയനായ ശിവകാര്‍ത്തികേയന്‍റെ ഏറ്റവും പ്രതീക്ഷയേകുന്ന ചിത്രങ്ങളിലൊന്നാണ് 'മാവീരൻ'. മഡോണി അശ്വിൻ സംവിധാനം ചെയ്യുന്ന ചിത്രത്തിന്‍റെ ഓരോ അപ്ഡേഷനുകൾക്കും ആകാംക്ഷയോടെ കാതോർത്തിരിപ്പാണ് ആരാധകർ. ഇവർക്ക് ആഹ്ളാദത്തിനുള്ള വകയുമായാണ് ഇപ്പോൾ അണിയറക്കാർ എത്തിയിരിക്കുന്നത്. 'മാവീരൻ' ചിത്രത്തിന്‍റെ ഡബ്ബിംഗ് തുടങ്ങി എന്ന് അറിയിച്ച് വീഡിയോ പുറത്തുവിട്ടിരിക്കുകയാണ് അണിയറ പ്രവർത്തകർ.
സംവിധായകൻ എസ് ഷങ്കറിന്‍റെ മകള്‍ അദിതിയാണ് ചിത്രത്തില്‍ നായികയാകുന്നത്. സംവിധാനത്തിന് പുറമെ മഡോണി അശ്വിന്‍ തന്നെയാണ് ചിത്രത്തിന്‍റെ തിരക്കഥയും ഒരുക്കിയിരിക്കുന്നത്. വിധു അയ്യണ്ണ ഛായാഗ്രഹണം നിര്‍വഹിക്കുന്ന ചിത്രത്തിനായി സംഗീതം ഒരുക്കുന്നത് ഭരത് ശങ്കര്‍ ആണ്.
ഓഗസ്റ്റ് 11ന് 'മാവീരൻ' തിയേറ്ററുകളില്‍ പ്രദർശനത്തിനെത്തും. ആമസോണ്‍ പ്രൈം വീഡിയോയാണ് ചിത്രത്തിന്‍റെ ഒടിടി റൈറ്റ്‍സ് സ്വന്തമാക്കിയിരിക്കുന്നത്. അതേസമയം 'പ്രിൻസ് ആണ്' ശിവകാര്‍ത്തികേയൻ നായകനായി ഏറ്റവും ഒടുവില്‍ തിയേറ്ററുകളില്‍ എത്തിയ ചിത്രം.
അനുദീപ് കെ വി സംവിധാനം ചെയ്‌ത ഈ റൊമാന്‍റിക് കോമഡി ചിത്രത്തിന് എന്നാല്‍ ബോക്‌സോഫിസില്‍ കാര്യമായ ചലനമുണ്ടാക്കാന്‍ കഴിഞ്ഞിരുന്നില്ല. വിദേശ യുവതിയുമായി പ്രണയത്തിലാകുന്ന തമിഴ് ടൂറിസ്റ്റ് ഗൈഡായിട്ടാണ് ശിവകാര്‍ത്തികേയൻ ചിത്രത്തില്‍ വേഷമിട്ടത്. യുക്രൈൻ താരം മറിയ റിയബോഷ്‍പ്‍കയായിരുന്നു ചിത്രത്തിലെ നായിക. ശ്രീ വെങ്കടേശ്വരൻ സിനിമാസ് എല്‍എല്‍പി നിര്‍മിച്ച 'പ്രിൻസില്‍' സത്യരാജും പ്രധാന കഥാപാത്രമായി എത്തിയിരുന്നു.
ALSO READ:'മുസ്ലീം വിദ്വേഷം ഫാഷനായി മാറി', ബോളിവുഡിന്‍റെ മൗനം പുതിയ കാര്യമല്ലെന്നും നസിറുദ്ദീൻ ഷാ
ആര്‍ രവികുമാർ സംവിധാനം ചെയ്യുന്ന 'അയലാൻ' എന്ന സയൻസ് ഫിക്ഷൻ ചിത്രവും ശിവകാര്‍ത്തികേയന്‍റേതായി റിലീസിനൊരുങ്ങുന്നുണ്ട്. എ ആര്‍ റഹ്‍മാനാണ് ചിത്രത്തിന്‍റെ സംഗീത സംവിധായകൻ എന്നതും 'അയലാന്‍റെ' പ്രത്യേകതയാണ്. ദീപാവലി റിലീസായാണ് 'അയലാൻ' പ്രദർശനത്തിന് എത്തുക.
ALSO READ:സുരേഷേട്ടനും സുമലത ടീച്ചറും അങ്ങനെ ഒന്നിക്കുകയാണ് സുഹൃത്തുക്കളേ; വ്യത്യസ്‌തമായി 'ഹൃദയഹാരിയായ പ്രണയകഥ' ലോഞ്ചിങ്
അതേസമയം ഇന്ത്യൻ ക്രിക്കറ്റ് താരമായ നടരാജന്‍റെ ജീവിത കഥ പറയുന്ന സിനിമയിലും ശിവകാര്‍ത്തികേയൻ നായകനാകുന്നുമെന്ന് അടുത്തിടെ റിപ്പോര്‍ട്ടുകൾ ഉണ്ടായിരുന്നു. ഒരു വാര്‍ത്താസമ്മേളനത്തിനിടെ നടരാജൻ തന്നെയാണ് ഇക്കാര്യം പറഞ്ഞത്. ശിവകാര്‍ത്തികേയൻ തന്നെ ഈ ജീവചരിത്ര സിനിമ സംവിധാനം ചെയ്‌തേക്കുമെന്നും റിപ്പോര്‍ട്ടുകളുണ്ട്. എന്നാല്‍ ഇക്കാര്യത്തില്‍ ഔദ്യോഗിക സ്ഥിരീകരണമൊന്നും ഇതുവരെയും വന്നിട്ടില്ല. ഇന്ത്യൻ ക്രിക്കറ്റ് ടീമില്‍ 2020 ഡിസംബറില്‍ അരങ്ങേറിയ താരമാണ് ടി നടരാജൻ. തമിഴ്‌നാനാട് ക്രിക്കറ്റ് ടീമിന്‍റെയും ഭാഗമാണ് ടി നടരാജൻ.
കൂടാതെ രാജ്‍കുമാര്‍ പെരിയസാമി സംവിധാനം ചെയ്യുന്ന പുതിയ ചിത്രത്തിലും ശിവകാര്‍ത്തികേയന്‍ നായകനായി എത്തുന്നുണ്ട്. രാജ്‍കമല്‍ ഫിലിംസ് ഇന്‍റര്‍നാഷണലിന്‍റെ ബാനറില്‍ കമല്‍ഹാസനാണ് ചിത്രം നിര്‍മിക്കുന്നത്. സോണി പിക്ചേഴ്‌സ് ഫിലിംസ് ഇന്ത്യയാണ് സഹനിര്‍മാണം. തമിഴ് ആക്ഷന്‍ ക്രൈം ചിത്രം 'റംഗൂണി'ലൂടെ ശ്രദ്ധ നേടിയ സംവിധായകനാണ് രാജ്‍കുമാര്‍ പെരിയസാമി. അതേസമയം ചിത്രത്തിന്‍റെ ഷൂട്ടിങ് സംബന്ധിച്ച വിവരങ്ങൾ ഉൾപ്പടെയുള്ള കാര്യങ്ങൾ അണിയറ പ്രവർത്തകർ പുറത്തുവിട്ടിട്ടില്ല.
