നാല് വര്‍ഷത്തെ നീണ്ട ഇടവേളയ്‌ക്ക് ശേഷം തന്‍റേതായി തിയേറ്ററുകളിലെത്തിയ ചിത്രം 'പഠാനെ' സ്വീകരിച്ച പ്രേക്ഷകര്‍ക്ക് നന്ദി പറഞ്ഞ് ഷാരൂഖ് ഖാന്‍. ഉപദേശ രൂപേണ ആയിരുന്നു ഷാരൂഖിന്‍റെ പ്രതികരണം. നമ്മുടെ തിരിച്ചു വരവിനെ കുറിച്ച് നമ്മള്‍ ഒരിക്കലും പ്ലാന്‍ ചെയ്യരുതെന്നും എപ്പോഴും മുന്നോട്ട് പോകാന്‍ ശ്രമിക്കണമെന്നുമായിരുന്നു ഷാരൂഖിന്‍റെ ഉപദേശം.
ഒരു 57 വയസ്സുകാരന്‍റെ ഉപദേശമായി എടുത്താല്‍ മതിയെന്നും ഷാരൂഖ് പറഞ്ഞു. ട്വിറ്ററിലൂടെയായിരുന്നു നടന്‍റെ പ്രതികരണം. 'നിങ്ങള്‍ നിങ്ങളുടെ തിരിച്ചു വരവ് പ്ലാന്‍ ചെയ്യരുത്. മുന്നോട്ട് പോകാനാണ് നിങ്ങള്‍ ശ്രമിക്കേണ്ടത്, ഒരിക്കലും പിന്നോട്ട് പോകരുത്, എപ്പോഴും തുടങ്ങി വെച്ചത് പൂര്‍ത്തിയാക്കാന്‍ ശ്രമിക്കുക. ഒരു 57 വയസ്സുകാരന്‍റെ ഉപദേശമായി കണ്ടാല്‍ മതി.'-ഷാരൂഖ് ഖാന്‍ കുറിച്ചു.