ചെന്നൈ: പഠാൻ സിനിമ ബോക്‌സോഫിസിൽ കുതിപ്പ് തുടരുമ്പോൾ വിശ്രമമില്ലാതെ അടുത്ത ലൊക്കേഷനിലേക്ക് നീങ്ങുകയാണ് ബോളിവുഡ് സൂപ്പർതാരം ഷാരൂഖ് ഖാൻ. നിലവിൽ അറ്റ്ലി സംവിധാനം ചെയ്യുന്ന 'ജവാൻ' എന്ന സിനിമയുടെ ചിത്രീകരണത്തിനായി ചെന്നൈയിലാണ് ഷാരൂഖ്. ലൊക്കേഷനിലേക്കുള്ള യാത്രയ്‌ക്കിടയിൽ ചെന്നൈയിൽ ആരാധകവൃത്തത്തിനിടയിൽ അകപ്പെട്ട താരത്തിന്‍റെ ചിത്രങ്ങളും ദൃശ്യങ്ങളും സമൂഹമാധ്യമങ്ങളിൽ വൈറലാകുകയാണ്.
ജവാൻ സഹതാരം നയൻതാരയുടെ ചെന്നൈയിലെ വസതിയിൽ എത്തിയപ്പോൾ വൻ ജനക്കുട്ടമാണ് താരത്തെ കാണാൻ തടിച്ചുകൂടിയത്. നയൻതാരയുടെ വീട്ടിൽ നിന്ന് ഇറങ്ങിയപ്പോൾ ആരാധകർ അദ്ദേഹത്തെ വളയുകയും കവിളിൽ തൊടാൻ ശ്രമിക്കുകയും ചെയ്യുന്ന ദൃശ്യങ്ങൾ കാമറകളിൽ പതിഞ്ഞു. ഡെനിം ടീഷർട്ടിനൊപ്പം കറുത്ത ജാക്കറ്റും കറുത്ത സൺ ഗ്ലാസും ധരിച്ചെത്തിയ താരം ആരാധക ഹൃദയം കീഴടക്കി.