Shah Rukh Khan hoist National Flag at Mannath: സ്വാതന്ത്ര്യത്തിന്‍റെ 75-ാം വാര്‍ഷിക ആഘോഷമായ ആസാദി കാ അമൃത്‌ മഹോത്സവത്തിന്‍റെ ഭാഗമായുള്ള ഹര്‍ ഘര്‍ തിരംഗ കാമ്പയിനില്‍ പങ്കുചേര്‍ന്ന് ബോളിവുഡ് സൂപ്പര്‍താരം ഷാരൂഖ് ഖാന്‍. മുംബൈയിലെ സ്വന്തം വസതിയായ മന്നത്തിലാണ് ഷാരൂഖും കുടുംബവും ദേശീയ പതാക ഉയര്‍ത്തിയത്. ഷാരൂഖിനൊപ്പം ഭാര്യ ഗൗരി ഖാന്‍, മക്കളായ ആര്യന്‍ ഖാന്‍, അബ്രാം ഖാന്‍ എന്നിവരും ഉണ്ടായിരുന്നു. പുതിയ സിനിമയായ 'ദി ആര്‍ച്ചീസി'ന്‍റെ തിരക്ക് കാരണം മകള്‍ സുഹാനയ്‌ക്ക് ചടങ്ങിന്‍റെ ഭാഗമാകാന്‍ കഴിഞ്ഞില്ല.
Shah Rukh Khan pens Independence message: 'ഇന്ത്യയുടെ സ്വാതന്ത്ര്യത്തിനായുള്ള നമ്മുടെ സ്വാതന്ത്ര്യ സമര സേനാനികളുടെ ത്യാഗം വീട്ടിലെ ചെറുപ്പക്കാരെ പഠിപ്പിക്കാന്‍ ഞങ്ങള്‍ ഇനിയും പരിശ്രമിക്കും. എന്നാല്‍ കൊച്ചു കുട്ടി പതാക ഉയര്‍ത്തിയത് ഞങ്ങളില്‍ സ്‌നേഹവും സന്തോഷവും അഭിമാനവും ജനിപ്പിച്ചു', കുടുംബത്തോടൊപ്പം ദേശീയ പതാക ഉയര്‍ത്തുന്ന വീഡിയോ പങ്കുവച്ച് ഷാരൂഖ് ഖാന്‍ ട്വിറ്ററില്‍ കുറിച്ചു. ഭാര്യ ഗൗരി ഖാനും സ്വാതന്ത്ര്യ ദിനാശംസകള്‍ എന്ന് കുറിച്ച് കൊണ്ട് ചിത്രങ്ങള്‍ സോഷ്യല്‍ മീഡിയയില്‍ പോസ്‌റ്റ്‌ ചെയ്‌തിരുന്നു.
Har Ghar Tiranga campaign: ഓഗസ്‌റ്റ് 13 മുതല്‍ 15 വരെയാണ് ഹര്‍ ഘര്‍ തിരംഗ കാമ്പയിന്‍ ആരംഭിച്ചത്. 20 കോടിയിലധികം വീടുകളില്‍ ത്രിവര്‍ണ്ണ പതാക ഉയര്‍ത്തുകയാണ് കാമ്പയിനിലൂടെ കേന്ദ്ര സര്‍ക്കാര്‍ ലക്ഷ്യമിടുന്നത്. കേന്ദ്ര ആഭ്യന്തര മന്ത്രാലയത്തിന്‍റെ നേതൃത്വത്തില്‍ നടക്കുന്ന പരിപാടി സംസ്ഥാനങ്ങളില്‍ മുഖ്യമന്ത്രിമാരും കേന്ദ്ര ഭരണ പ്രദേശങ്ങളില്‍ ലെഫ്‌റ്റനന്‍റ്‌ ഗവര്‍ണര്‍മാരുമാണ് ഏകോപിക്കുക. കേരളത്തില്‍ മമ്മൂട്ടി, മോഹന്‍ലാല്‍, സുരേഷ്‌ ഗോപി ഉള്‍പ്പെടെയുളള താരങ്ങള്‍ ഹര്‍ ഘര്‍ തിരംഗയുടെ ഭാഗമായിട്ടുണ്ട്.