സെക്‌സ് എന്ന് ഉറക്കെയൊന്ന് പറയാൻ മടിക്കുന്ന, പ്രണയം കുറ്റമാണെന്ന് പറഞ്ഞുപഠിപ്പിക്കുന്ന കാലത്ത് വലിയൊരു മാറ്റം സൃഷ്‌ടിച്ചുകൊണ്ട് കടന്നുവന്ന, തീർച്ചയായും കണ്ടിരിക്കേണ്ട സീരീസുകളിലൊന്നാണ് നെറ്റ്ഫ്ലിക്സിന്റെ 'സെക്‌സ് എജ്യുക്കേഷന്‍'. ഇപ്പോഴിതാ 'സെക്‌സ് എജ്യുക്കേഷന്‍' ഫൈനല്‍ സീസണിന്‍റെ (Sex Education Season 4) വരവറിയിച്ചിരിക്കുകയാണ് നെറ്റ്ഫ്ലിക്‌സ്. നാലാമത്തെ സീസണിന്‍റെ ടീസർ നെറ്റ്ഫ്ലിക്‌സ് പുറത്തുവിട്ടു.
ഹൈസ്‌കൂള്‍ വിദ്യാര്‍ഥിയായ ഓടിസ്, അമ്മ ജീന്‍, സഹപാഠികളായ മേവ്, എറിക്, ആഡം, എയ്‌മി, റൂബി തുടങ്ങിയവരുടെ സംഭവ ബഹുലമായ കഥയാണ് 'സെക്‌സ് എജ്യുക്കേഷന്‍' പറയുന്നത്. സ്‌കൂളിലെ വിദ്യാര്‍ഥികളുടെ ഒരു സെക്‌സ് തെറാപ്പിസ്റ്റായി ഓടിസ് മാറുന്നതും പിന്നീട് നടക്കുന്ന സംഭവ വികാസങ്ങളുമാണ് 'സെക്‌സ് എജ്യുക്കേഷൻ' പ്രമേയമാക്കുന്നത്.
സെക്‌സ് തെറാപ്പിസ്റ്റാണ് ജീന്‍. അമ്മയെ പോലെ ഓടിസും സ്‌കൂളിലെ വിദ്യാര്‍ഥികളുടെ സെക്‌സ് തെറാപ്പിസ്റ്റായി മാറുന്നു. തനിക്കറിയാവുന്നതും അറിയാത്തവ പഠിച്ചും സ്‌കൂളിലെ മറ്റ് കുട്ടികള്‍ക്ക് സെക്‌സില്‍ ഉപദേശങ്ങള്‍ നല്‍കുകയാണ് ഓടിസ്. ലൈംഗിക ബന്ധം, സെക്ഷ്വാലിറ്റി തുടങ്ങിയവയുമായി ബന്ധപ്പെട്ട പ്രശ്‌നങ്ങളും സംശയങ്ങളുമാണ് വിദ്യാര്‍ഥികള്‍ ഓടിസിനോട് പറയുന്നത്. ഓടിസും സുഹൃത്ത് മേവും ചേര്‍ന്ന് അതിന് പണം വാങ്ങുകയും ചെയ്യുന്നുണ്ട്.
സെക്‌സ് എന്നത് അടക്കം പറയേണ്ട ഒന്നല്ലെന്ന് ഈ സീരീസ് കൃത്യമായി പറയുന്നുണ്ട്. സെക്‌സില്‍ എല്ലാവര്‍ക്കും അവരുടേതായ ആഗ്രഹങ്ങളും താത്പര്യങ്ങളും ഉണ്ടാവുമെന്നും അതാണ് ആദ്യം കണക്കിലെടുക്കേണ്ടതെന്നും സീരീസ് പറഞ്ഞുവയ്‌ക്കുന്നു. പരസ്‌പര ബന്ധങ്ങളും സൗഹൃദവും പ്രണയവും വേദനയും വിരഹവുമെല്ലാം സീരീസിലുടനീളം വന്നുപോകുന്നു.