Salaar Team Drops Prithviraj's Poster : 'വരധരാജ മന്നാർ, ദി കിംഗ്' ; പൃഥ്വിരാജിന് പിറന്നാൾ ആശംസകളുമായി സലാർ ടീം, പുതിയ പോസ്റ്റർ പുറത്ത്

Prithviraj's New Look from Salaar : ആക്ഷൻ - ത്രില്ലർ ചിത്രമായ സലാറിൽ പ്രതിനായകന്‍റെ വേഷത്തിലാണ് പൃഥ്വിരാജ് എത്തുക

ഹൈദരാബാദ് :മലയാളത്തിന്‍റെ പ്രിയ താരം പൃഥ്വിരാജ് സുകുമാരന്‍റെ 41-ാം പിറന്നാൾ ദിനമാണിന്ന്. നടനായും സംവിധായകനായും നിർമാതാവായും ഗായകനായും തിളങ്ങുന്ന ഈ ബഹുമുഖ പ്രതിഭയെ ആശംസകൾ കൊണ്ട് പൊതിയുകയാണ് ആരാധകരും സുഹൃത്തുക്കളും. ഈ വേളയിൽ പ്രിയ നടന് ആശംസകൾ നേർന്ന് രംഗത്തെത്തിയിരിക്കുകയാണ് പൃഥ്വിരാജ് പ്രധാന വേഷത്തിൽ അണിനിരക്കുന്ന 'സലാർ' എന്ന ചിത്രത്തിന്‍റെ അണിയറക്കാർ (Salaar Team wishes Prithviraj on his birthday).

പൃഥ്വിരാജിന്‍റേതായി ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിൽ ഒന്നാണ് സലാർ. പിറന്നാൾ ആശംസകൾക്കൊപ്പം സലാറിലെ താരത്തിന്‍റെ പുതിയ ലുക്കും നിർമാതാക്കൾ പങ്കുവച്ചിട്ടുണ്ട് ( Salaar Team drops Prithviraj's poster). പിറന്നാൾ ആഘോഷങ്ങളുടെ ആവേശത്തിലാണ്ട ആരാധകർക്ക് ഇരട്ടി മധുരമായിരിക്കുകയാണ് പുതിയ പോസ്റ്റർ (Prithviraj's New Look from Salaar).

ആക്ഷൻ - ത്രില്ലർ ചിത്രമായ സലാറിൽ നായകനെ വിറപ്പിക്കുന്ന പ്രതിനായകന്‍റെ വേഷത്തിലാണ് പൃഥ്വിരാജ് എത്തുക. പ്രഭാസ് ആണ് ഈ ചിത്രത്തിലെ നായകൻ. ഡിസംബർ 22ന് ക്രിസ്‌മസ് റിലീസായി സലാർ പ്രേക്ഷകരിലേക്കെത്തും.

വരധരാജ മന്നാർ എന്നാണ് പൃഥ്വി അവതരിപ്പിക്കുന്ന കഥാപാത്രത്തിന്‍റെ പേര്. 'വരധരാജ മന്നാർ, ദി കിംഗ്' എന്ന് അഭിസംബോധന ചെയ്‌തുകൊണ്ടാണ് അണിയറ പ്രവർത്തകർ പോസ്റ്റർ പുറത്തുവിട്ടത്. ഗംഭീരമായ ഒരു ജന്മദിനവും ടീം തങ്ങളുടെ പ്രിയ താരത്തിന് നേർന്നു. സലാറിലെ വരധരാജ മന്നാറുടെ പുത്തൻ ലുക്ക് സമൂഹ മാധ്യമങ്ങളിൽ കൊടുങ്കാറ്റായി മാറിക്കഴിഞ്ഞിരിക്കുകയാണ്.

അതേസമയം സലാർ ടീമിന്‍റെ ആശംസകൾക്ക് നന്ദി അറിയിച്ച് പൃഥ്വിരാജ് രംഗത്തെത്തി. 'ഹോംബാലെ ഫിലിംസിനും പ്രശാന്ത് നീലിനും പ്രഭാസിനും സലാറിന്‍റെ മുഴുവൻ ടീമിനും നന്ദി!. ലോകം ഈ ഇതിഹാസം കാണുന്നതുവരെ കാത്തിരിക്കാനാവില്ല!'- താരം കുറിച്ചു. സെപ്റ്റംബർ 22-ന് തിയേറ്ററുകളിൽ കാണാമെന്നും താരം പ്രേക്ഷകരോട് പറഞ്ഞു.

ശ്രുതി ഹാസനും ഈ ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്. ജഗപതി ബാബു, മധു ഗുരുസ്വാമി, ഈശ്വരി റാവു എന്നിവരാണ് മറ്റ് പ്രധാന താരങ്ങൾ. 'കാന്താര, കെജിഎഫ്' തുടങ്ങിയ സിനിമകൾ അണിയിച്ചൊരുക്കിയ വിജയ് കിരഗണ്ടൂരിന്‍റെ (Vijay Kiragandur) ഹോംബാലെ ഫിലിംസാണ് ഈ ചിത്രം നിർമിക്കുന്നത്. തെലുഗു, കന്നഡ, തമിഴ്, മലയാളം, ഹിന്ദി, ഇംഗ്ലീഷ് ഭാഷകളിലാണ് ചിത്രം പ്രേക്ഷകർക്കരികില്‍ എത്തുക.

ഭുവൻ ഗൗഡ ഛായാഗ്രഹണം നിർവഹിക്കുന്ന ചിത്രത്തിന്‍റെ എഡിറ്റിങ് കൈകാര്യം ചെയ്യുന്നത് ഉജ്വൽ കുൽക്കർണി (Ujwal Kulkarni) ആണ്. രവി ബസ്രുർ (Ravi Basrur) ആണ് 'സലാറി'ലെ ഗാനങ്ങൾക്ക് ഈണം പകരുന്നത്. ആക്ഷനും പ്രധാന്യമുള്ള ചിത്രത്തിന്‍റെ സംഘട്ടന രംഗങ്ങൾക്ക് പിന്നിൽ അൻപറിവാണ് (Anbarivu).

അതേസമയം ലഡാക്കിലാണ് പൃഥ്വിരാജ് തന്‍റെ പിറന്നാള്‍ ആഘോഷിക്കുന്നത് (Prithviraj Enjoys Working Birthday). 'എമ്പുരാന്‍റെ' ചിത്രീകരണവുമായി ബന്ധപ്പെട്ട് ലഡാക്കിലാണ് നിലവിൽ പൃഥ്വിരാജ്. 'എമ്പുരാന്‍' ടീമും താരത്തിന് പിറന്നാള്‍ ആശംസകള്‍ നേര്‍ന്നിട്ടുണ്ട് (Empuraan Team birthday wishes to Prithviraj).

മോഹന്‍ലാല്‍ ഉള്‍പ്പടെയുള്ള 'എമ്പുരാന്‍' ടീം സംവിധായകന് ആശംസകള്‍ നേരുന്ന വീഡിയോ സോഷ്യല്‍ മീഡിയയില്‍ ശ്രദ്ധ നേടുകയാണ്. മോഹന്‍ലാലിന് പുറമെ മുരളി ഗോപി, ദീപക് ദേവ്, ആന്‍റണി പെരുമ്പാവൂര്‍, സുജിത്ത് വാസുദേവ് തുടങ്ങിയവരും വീഡിയോയിലൂടെ പൃഥ്വിരാജിന് ആശംസ അറിയിച്ചിട്ടുണ്ട്.