ഹൈദരാബാദ് :പ്രഭാസിനൊപ്പം മലയാളത്തിന്‍റെ പ്രിയ താരം പൃഥ്വിരാജും അണിനിരക്കുന്ന 'സലാർ ഭാഗം 1 സീസ്‌ഫയര്‍' (Salaar Part 1 Ceasefire) സിനിമയുടെ വമ്പൻ അപ്‌ഡേറ്റ് പുറത്ത്. സിനിമയിലെ ആദ്യ ഗാനത്തിന്‍റെ റിലീസ് സംബന്ധിച്ച ആവേശകരമായ വിവരമാണ് അണിയറ പ്രവർത്തകർ പുറത്ത് വിട്ടിരിക്കുന്നത്. ചിത്രത്തിലെ ആദ്യ സിംഗിൾ നാളെ പുറത്തുവരും (First Single from Salaar Ceasefire will out tomorrow).
പ്രേക്ഷകരിലും ആരാധകരിലും ഏറെ ആവേശം പകരുന്ന വാർത്ത സൈബറിടത്തിലും തരംഗമാവുകയാണ്. അടുത്തിടെ പുറത്തുവന്ന ചിത്രത്തിന്‍റെ ട്രെയിലർ ആരാധകരെ ആവേശക്കൊടുമുടി കയറ്റിയിരുന്നു. ഇപ്പോഴിതാ ആദ്യ ഗാനത്തിന്‍റെ വരവും ഗംഭീരമാക്കാനുള്ള ഒരുക്കത്തിലാണ് അവർ.
ഈ വർഷം പുറത്തിറങ്ങുന്നവയിൽ ഏറ്റവും പ്രതീക്ഷയുള്ള ചിത്രങ്ങളിലൊന്നാണ് സലാർ. കെജിഎഫിന്‍റെ അമരക്കാരൻ പ്രശാന്ത് നീൽ ഒരുക്കുന്ന ചിത്രം എന്നത് തന്നെയാണ് സലാറിന്‍റെ പ്രതീക്ഷയേറ്റുന്ന പ്രധാന ഘടകം. പ്രഭാസ് നായകനാകുന്ന ഈ ആക്ഷൻ പാക്ക്‌ഡ് ചിത്രം ബോക്‌സോഫിസിൽ പുതു ചരിത്രം കുറിക്കുമെന്ന് തന്നെയാണ് വിലയിരുത്തൽ.
കെജിഎഫ് ഫ്രാഞ്ചൈസി ഒരുക്കിയ ഹോംബാലെ ഫിലിംസ് തന്നെയാണ് സലാറിന്‍റെയും നിർമാതാക്കൾ. ഹോംബാലെ ഫിലിംസിന്‍റെ ബാനറില്‍ വിജയ് കിരഗണ്ടൂര്‍ ആണ് സലാർ നിര്‍മിക്കുന്നത്. 'സലാർ ഭാഗം 1 സീസ്‌ഫയറിലെ ആദ്യ സിംഗിൾ നാളെ' എന്ന് കുറിച്ചുകൊണ്ടാണ് നിർമാതാക്കൾ ഗാനത്തിന്‍റെ വരവറിയിച്ചത്. ഗാനത്തിന്‍റെ പോസ്റ്ററും ഹോംബാലെ ഫിലിംസ് പങ്കുവച്ചിട്ടുണ്ട്.
ലോകമൊട്ടാകെയുള്ള തിയേറ്ററുകളില്‍ ഡിസംബർ 22നാണ് സലാർ റിലീസിനെത്തുക. ഹിന്ദി, തമിഴ്, തെലുഗു, കന്നഡ, മലയാളം ഭാഷകളിൽ ഈ ആക്ഷൻ ത്രില്ലർ പ്രേക്ഷകരിലേക്കെത്തും (Salaar Release). കഴിഞ്ഞ ദിവസമാണ് ചിത്രത്തിന്‍റെ സെന്‍സറിങ് പൂര്‍ത്തിയായ വിവരം നിർമാതാക്കൾ ഔദ്യോഗികമായി അറിയിച്ചത്.