രണ്‍ബീര്‍ കപൂറിന്‍റെതായി ഏറ്റവും ഒടുവില്‍ തിയേറ്ററുകളില്‍ എത്തിയ ചിത്രമാണ് 'തൂ ജൂട്ടി മേം മക്കാര്‍'. ലവ്‌ രഞ്ജന്‍ സംവിധാനം ചെയ്‌ത ചിത്രം മാര്‍ച്ച് എട്ടിനാണ് തിയേറ്ററുകളില്‍ എത്തിയത്. മികച്ച ഓപ്പണിങ് കലക്ഷനാണ് സിനിമയ്‌ക്ക് ലഭിച്ചത്.
'തൂ ജൂട്ടി മേം മക്കാറി'നായുള്ള രണ്‍ബീര്‍ കപൂറിന്‍റെ ഷര്‍ട്ടിടാതെയുള്ള സിക്സ് പാക്ക് ചിത്രങ്ങള്‍ ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുകയാണ്. ഈ രൂപം എങ്ങനെയാണ് രണ്‍ബീര്‍ നേടിയെടുത്തതെന്ന് താരത്തിന്‍റെ ഫിറ്റ്നസ് ട്രെയിനര്‍ ശിവോഹം പറയുന്നു. ഇന്‍സ്‌റ്റഗ്രാമിലൂടെയാണ് ഫിറ്റ്നസ് ട്രെയിനറുടെ വെളിപ്പെടുത്തല്‍.
രണ്‍ബീര്‍ കപൂറിന്‍റെ രണ്ട് ഷര്‍ട്ടിടാത്ത ചിത്രങ്ങള്‍ക്കൊപ്പം നീണ്ട ഒരു കുറിപ്പുമായാണ് ശിവോഹം ഇന്‍സ്‌റ്റഗ്രാമില്‍ എത്തിയിരിക്കുന്നത്. സിനിമയിലെ ഗെറ്റപ്പിനായി രണ്‍ബീര്‍ കഠിനമായ വ്യായാമവും പരിശീലനവുമാണ് നടത്തിയതെന്ന് ഫിറ്റ്നസ് ട്രെയിനര്‍ പറയുന്നു. ഈ ലുക്ക് നേടിയെടുക്കുന്നതിനായി രണ്‍ബീര്‍ അങ്ങേയറ്റം അച്ചടക്കവും അര്‍പ്പണബോധവും കാണിച്ചുവെന്ന് പ്രശംസിച്ച് കൊണ്ടാണ് ഫിറ്റ്നസ് ട്രെയിനര്‍ പോസ്‌റ്റ് പങ്കുവച്ചത്.
'അച്ചടക്കമുള്ള ജീവിത ശൈലിയുടെയും അര്‍പ്പണ ബോധത്തിന്‍റെയും കഠിനാധ്വാനത്തിന്‍റെയും ഒരു ഉദാഹരണമാണ് നിങ്ങള്‍ കാണുന്നത്. ഇതൊരു ടീം പ്രയത്‌നമാണ്. അര്‍ദ്ധ ഹൃദയത്തോടെയുള്ള പങ്കാളിത്തം കൊണ്ട് ഇതുപോലുള്ള റിസള്‍ട്ടുകള്‍ നേടാനാവില്ല. പോഷകാഹാരം, സപ്ലിമെന്‍റുകള്‍, പരിശീലനം എന്നിവയേക്കാള്‍ ആവശ്യമുള്ളത് ചെയ്യുക എന്നതാണ്. നിങ്ങള്‍ നിങ്ങളുടെ ലക്ഷ്യങ്ങള്‍ നേടുന്നതിനുള്ള പ്രധാന കാരണം ഇതാണ്. നിങ്ങളെ ഇതാണ് മറ്റുള്ളവരില്‍ നിന്നും വ്യത്യസ്‌തനാക്കുന്നത്.