വിവാഹ ആഘോഷങ്ങൾക്ക് താൽക്കാലിക അവധി ; ഷൂട്ടിങ് തിരക്കിലേക്ക് രണ്‍ബീർ - ആലിയ ദമ്പതികൾ

ഏപ്രിൽ 14ന് വളരെ അടുത്ത ബന്ധുക്കൾ മാത്രം പങ്കെടുത്ത ചടങ്ങോടെയായിരുന്നു രണ്‍ബീർ- ആലിയ ജോഡികളുടെ വിവാഹം

മുംബൈ :ബോളിവുഡിൽ ഏറ്റവുമധികം ചർച്ചയായ താര വിവാഹത്തിന് പിന്നാലെ രണ്‍ബീർ- ആലിയ ദമ്പതികൾ ഷൂട്ടിങ് തിരക്കുകളിലേക്ക് മടങ്ങി. ഏപ്രിൽ 14ന് നടന്ന വിവാഹത്തിന് നാല് ദിവസങ്ങൾക്കുള്ളിലാണ് ഇരുവരും ഷൂട്ടിങ്ങ് ചർച്ചകൾ പുനരാരംഭിച്ചത്. ഇന്ന് മുംബൈയിലെ ടി- സീരീസ് ഓഫീസിൽ എത്തിയ രണ്‍ബീറിന്‍റെ ചിത്രങ്ങൾ സോഷ്യൽ മീഡിയയിൽ വൈറലായിരുന്നു.

കല്യാണത്തിന് ശേഷം ഇന്നാണ് രണ്‍ബീർ പൊതുസ്ഥലത്ത് പ്രത്യക്ഷപ്പെട്ടുന്നത്. ഷൂട്ടിങ് തിരക്കുകളിലായതിനാൽ ഇരുവരും വിവാഹത്തിനായി ഇടവേള എടുത്തിരുന്നില്ല. വിവാഹത്തിന് മൂന്ന് ദിവസം മുമ്പ് പോലും 'റോക്കി ഔർ റാണി കി പ്രേം കഹാനി' എന്ന ചിത്രത്തിന്‍റെ ഗാന ചിത്രീകരണത്തിൽ ആലിയ പങ്കെടുത്തിരുന്നു.

നിലവിൽ സന്ദീപ് റെഡ്ഡി വംഗയുടെ അനിമൽ, ലവ് രഞ്ജന്‍റെ പുതിയ ചിത്രം, ഷംഷേര, ആലിയയുമായി ഒന്നിക്കുന്ന ബ്രഹ്മാസ്ത്ര എന്നീ ചിത്രങ്ങളുടെ പണിപ്പുരയിലാണ് രണ്‍ബീർ. റോക്കി ഔർ റാണി കി പ്രേം കഹാനിയാണ് ആലിയയുടേതായി നിലവിൽ ഷൂട്ടിങ് നടക്കുന്ന ചിത്രം. ഇത് കൂടാതെ ഒന്നിലധികം ചിത്രങ്ങളും ആലിയയുടേതായി പണിപ്പുരയിലുണ്ട്.

അതേസമയം താരദമ്പതികൾ ഹണിമൂണിനായി ദക്ഷിണാഫ്രിക്കയിലേക്ക് പോകുമെന്നാണ് റിപ്പോർട്ടുകൾ. ദക്ഷിണാഫ്രിക്കയിലെ സഫാരി ഡെസ്റ്റിനേഷനിലായിരുന്നു ഇരുവരും തങ്ങളുടെ പുതുവർഷം ആഘോഷിച്ചത്. ഇരുവരുടേയും ഇഷ്‌ട സ്ഥലം ദക്ഷിണാഫ്രിക്കയാണെന്നും അതിനാലാണ് ഹണിമൂണിനായി അവിടേക്ക് പോകാൻ തീരുമാനിച്ചതെന്നുമാണ് റിപ്പോർട്ടുകൾ.

ഏപ്രിൽ 14ന് വളരെ അടുത്ത ബന്ധുക്കൾ മാത്രം പങ്കെടുത്ത ചടങ്ങോടെയായിരുന്നു രണ്‍ബീർ- ആലിയ ജോഡികളുടെ വിവാഹം. അഞ്ച് വർഷം മുമ്പ് ബ്രഹ്മാസ്ത്ര എന്ന ചിത്രത്തിന്‍റെ ജോലിക്കിടെയാണ് രൺബീറും ആലിയയും പ്രണയത്തിലായത്. ശനിയാഴ്‌ച സുഹൃത്തുക്കൾക്കായി വിവാഹ വിരുന്നും ദമ്പതികൾ ഒരുക്കിയിരുന്നു. ഷാറൂഖ് ഖാൻ ഉൾപ്പടെയുള്ള സൂപ്പർ താരങ്ങൾ വിരുന്നിൽ പങ്കെടുത്തിരുന്നു.