Animal first look: രണ്‍ബീര്‍ കപൂര്‍ ആരാധകരുടെ കാത്തിരിപ്പിന് വിരാമം കുറിച്ചുകൊണ്ട് പുറത്തിറങ്ങിയ 'അനിമല്‍' ഫസ്‌റ്റ് ലുക്ക് പോസ്‌റ്റര്‍ വൈറലാവുന്നു. രക്തത്തില്‍ കുളിച്ച് കയ്യില്‍ കോടാലിയും പിടിച്ച് സിഗരറ്റ് കത്തിക്കാനൊരുങ്ങുന്ന രണ്‍ബീറിനെയാണ് പോസ്‌റ്ററില്‍ കാണാനാവുക. പുറത്തിറങ്ങി നിമിഷം നേരം കൊണ്ട് തന്നെ സോഷ്യല്‍ മീഡിയയില്‍ തരംഗമായി മാറിയിരിക്കുകയാണ് 'അനിമല്‍' ഫസ്‌റ്റ് ലുക്ക്.
'അനിമല്‍' പോസ്‌റ്റര്‍ യൂടൂബില്‍ ട്രെന്‍ഡിങ് ലിസ്‌റ്റിലും ഇടംപിടിച്ചിരുന്നു. ഒരു ദശലക്ഷത്തിലധികം പേര്‍ ഇതിനോടകം തന്നെ പോസ്‌റ്റര്‍ കണ്ടു കഴിഞ്ഞു. സംവിധായകന്‍ സന്ദീപ് റെഡ്ഡി ആണ് പോസ്‌റ്റര്‍ ട്വിറ്ററിലൂടെ പങ്കുവച്ചിരിക്കുന്നത്. 'അനിമലിന്‍റെ ഫസ്‌റ്റ് ലുക്ക് അവതരിപ്പിക്കുന്നു. എല്ലാവര്‍ക്കും പുതുവത്സരാശംസകള്‍'-ഇപ്രകാരമാണ് പോസ്‌റ്റര്‍ പങ്കുവച്ച് സംവിധായകന്‍ കുറിച്ചത്.
രണ്‍ബീര്‍ കപൂറിനെ നായകനാക്കി സന്ദീപ് റെഡ്ഡി വംഗ സംവിധാനം ചെയ്യുന്ന ചിത്രമാണ് 'അനിമല്‍'. ആക്ഷനും ഇമോഷനും പ്രാധാന്യം നല്‍കിയാണ് സന്ദീപ് റെഡ്ഡി ചിത്രം ഒരുക്കുന്നത്. അര്‍ജുന്‍ റെഡ്ഡി, കബീര്‍ സിങ് എന്ന സൂപ്പര്‍ഹിറ്റ് ചിത്രങ്ങള്‍ക്ക് ശേഷം സന്ദീപ് ഒരുക്കുന്ന സിനിമയെന്ന പ്രത്യേകതയും 'അനിമലി'നുണ്ട്.