മുംബൈ: അല്ലു അര്‍ജുന്‍ പ്രധാന വേഷത്തിലെത്തിയ പാന്‍ ഇന്ത്യന്‍ ബ്ലോക്ക് ബസ്‌റ്റര്‍ ചിത്രമായ "പുഷ്‌പ: ദി റൈസ്" ഡിസംബര്‍ എട്ടിന് റഷ്യയില്‍ റിലീസിനൊരുങ്ങുന്നു. ചിത്രത്തിന്‍റെ പ്രീമിയറും റഷ്യന്‍ ഭാഷയില്‍ ഡിസംബര്‍ ഒന്ന് മുതല്‍ മൂന്ന് വരെ മോസ്‌കോയിലും സെന്‍റ്. പീറ്റേഴ്‌സ്ബര്‍ഗിലും ഇന്ത്യന്‍ ഫിലിം ഫെസ്‌റ്റിവലിന്‍റെ ഭാഗമായി പ്രദര്‍ശിപ്പിക്കും. ചിത്രത്തിന്‍റെ സംവിധായകന്‍ സുകുമാര്‍, താരങ്ങളായ അല്ലു അര്‍ജുന്‍, രശ്‌മിക മന്ദാന, നിര്‍മാതാവായ രവി ശങ്കര്‍ തുടങ്ങിയവരും മോസ്‌കോയിലെ ഓഷ്യാന ഷോപ്പിങ് സെന്‍ററില്‍ വച്ച് നടത്തുന്ന ഫിലിം ഫെസ്‌റ്റിവലിന്‍റെ ഭാഗമാകുമെന്ന് പുഷ്‌പയുടെ ഔദ്യോഗിക ട്വിറ്റര്‍ പേജ് വ്യക്തമാക്കി.
'ഡിസംബര്‍ ഒന്നിന് മോസ്‌കോ, ഡിസംബര്‍ മൂന്നിന് സെന്‍റ്. പീറ്റേഴ്‌സ്ബര്‍ഗ് എന്നിവടങ്ങളിലും ചിത്രം പ്രദര്‍ശിപ്പിക്കും. റഷ്യന്‍ ഭാഷയില്‍ റഷ്യയില്‍ ഡിസംബര്‍ എട്ടിന് "പുഷ്‌പ ദ റൈസ്" റിലീസാകുമെന്ന് #PushpaTheRise #PushpaTheRise at the Russian language premieres' എന്ന ഹാഷ്‌ടാഗോടെ ഔദ്യോഗികമായി ട്വീറ്റ് പങ്കുവെച്ചു. സെന്‍റ് പീറ്റേഴ്‌സ്‌ബെര്‍ഗില്‍ ചിത്രം പ്രദര്‍ശിപ്പിക്കുന്ന ചടങ്ങില്‍ ചിത്രത്തിന്‍റെ അണിയറ പ്രവര്‍ത്തകരും പങ്കുചേരും.