ഇതിഹാസ കാവ്യമായ രാമായണത്തെ അടിസ്ഥാനമാക്കിയുള്ള 'ആദിപുരുഷ്' ആണ് പ്രഭാസിന്‍റേതായി റിലീസിനൊരുങ്ങുന്ന ചിത്രം. പ്രഭാസ് ആരാധകര്‍ നാളേറെയായി ആകാംക്ഷയോടെ കാത്തിരിക്കുന്ന പുരാണ ഫാന്‍റസി ചിത്രങ്ങളില്‍ ഒന്ന് കൂടിയാണിത്. രാമനവമിയോട് അനുബന്ധിച്ച് മാർച്ച് 30 മുതൽ സിനിമയുടെ പ്രൊമോഷന്‍ പരിപാടികള്‍ ആരംഭിച്ചിരിക്കുകയാണ്.
ഇതിന്‍റെ ഭാഗമായി 'ആദിപുരുഷി'ന്‍റെ പുതിയ പോസ്‌റ്റര്‍ അണിയറ പ്രവര്‍ത്തകര്‍ പുറത്തുവിട്ടു. ഭഗവാന്‍ രാമനായാണ് ചിത്രത്തില്‍ പ്രഭാസ് വേഷമിടുന്നത്. ജാനകി എന്ന കഥാപാത്രത്തെ കൃതി സനോണും അവതരിപ്പിക്കും. പ്രഭാസ്, കൃതി സനോൻ എന്നിവരെ കൂടാതെ സണ്ണി സിങ്ങും ചിത്രത്തില്‍ സുപ്രധാന വേഷത്തില്‍ എത്തുന്നുണ്ട്.
മാർച്ച് 30ന് രാമനവമി ദിനത്തില്‍ 'ആദിപുരുഷി'ന്‍റെ പ്രചാരണങ്ങള്‍ക്ക് തുടക്കം കുറിച്ചു. ഇതിന്‍റെ ഭാഗമായി ഭൂഷൺ കുമാറും സംവിധായകൻ ഓം റൗട്ടും മാതാ വൈഷ്ണോ ദേവിയുടെ അനുഗ്രഹം തേടി. ശ്രീരാമന്‍റെ കഥയെ ചുറ്റിപ്പറ്റിയുള്ളതാണ് ചിത്രം. തിന്മയുടെ മേലുള്ള നന്മയുടെ വിജയമാണ് പ്രമേയം.
പ്രഭാസ് ശ്രീരാമനായും കൃതി സനോൻ സീതയായും പോസ്‌റ്ററില്‍ പ്രത്യക്ഷപ്പെടുന്നു. ലക്ഷമണനായി സണ്ണി സിങ്ങും പോസ്‌റ്ററില്‍ ഇടംപിടച്ചു. മൂന്ന് ഭാഷകളിലായി പുറത്തിറങ്ങിയ പോസ്‌റ്റര്‍ പ്രഭാസ് തന്‍റെ ഇന്‍സ്റ്റ‌ഗ്രാമില്‍ പങ്കുവച്ചിട്ടുണ്ട്‌.
ടി സീരീസ് ഫിലിംസും റിട്രിഫിൽസും ചേർന്ന് 500 കോടി രൂപ ബജറ്റിലാണ് ചിത്രം നിർമിച്ചിരിക്കുന്നത്. ജൂണ്‍ 16ന് വേള്‍ഡ് വൈഡ് റിലീസായി തിയേറ്ററുകളില്‍ എത്തുന്ന ആദിപുരുഷ് ഇന്ത്യയിലെ ഏറ്റവും ചെലവേറിയ സിനിമകളിലൊന്നാണ്. ശ്രീരാമനായി പ്രഭാസ് എത്തുമ്പോള്‍ രാവണനായി വേഷം ഇടുന്നത് ബോളിവുഡ് താരം സെയ്‌ഫ് അലി ഖാന്‍ ആണ്. ലക്ഷ്‌മണനായാണ് സണ്ണി സിങ് എത്തുന്നത്.