ഹൈദരാബാദ്: ദസറ ആഘോഷത്തിലലിഞ്ഞ് ചേർന്ന നാളുകളാണ് കടന്നുപോയത്. രാജ്യത്തുടനീളം വൈവിധ്യങ്ങളായ ആഘോഷ പരിപാടികളാണ് സംഘടിക്കപ്പെട്ടത്. എന്നാൽ ചലച്ചിത്ര താരങ്ങളായ പൂജ ഹെഗ്‌ഡെയും ശ്രദ്ധ കപൂറും ഈ വർഷത്തെ തങ്ങളുടെ ദസറ കളറാക്കിയത് മറ്റൊരു രീതിയിലാണ്. കോടികൾ വിലമതിക്കുന്ന കാറുകൾ സ്വന്തമാക്കിയാണ് ഇരുവരും ദസറ ആഘോഷങ്ങൾക്ക് പൂർണതയേകിയത് (Pooja Hegde and Shraddha Kapoor welcome luxury Cars).
ഏകദേശം 4.8 കോടി രൂപ വിലമതിക്കുന്ന, ചുവന്ന നിറത്തിലുള്ള ലംബോർഗിനി ഹുറാകാൻ ടെക്‌നിക്കയാണ് ശ്രദ്ധ കപൂർ സ്വന്തമാക്കിയത്. പൂജയാകട്ടെ ഏതാണ്ട് ഇതേ വിലവരുന്ന റേഞ്ച് റോവർ എസ്‌വിയുമാണ് പുതുതായി തന്‍റെ ഗാരേജിലേക്ക് കൂട്ടിച്ചേർത്തത്. ദസറ ദിനത്തിൽ ബോളിവുഡ് താരസുന്ദരിമാർ പുതിയ കാറുകൾ വീട്ടിലെത്തിച്ചതോടെ ആരാധകരും ആവേശത്തിലായി (Pooja Hegde, Shraddha Kapoor Drove Home swanky New Cars).
തങ്ങളുടെ പുതിയ വാഹനങ്ങളുടെ ചിത്രങ്ങൾ ശ്രദ്ധയും പൂജയും സോഷ്യൽ മീഡിയയിൽ പങ്കിട്ടില്ലെങ്കിലും പല പേജുകളും ഇത് സംബന്ധിച്ച് വീഡിയോകൾ വരെ പുറത്തുവിട്ടിട്ടുണ്ട്. ഇൻസ്റ്റഗ്രാമിൽ താരസുന്ദരിമാരുടെ വാഹനങ്ങൾ വൈറലായി മാറിക്കഴിഞ്ഞു. തന്‍റെ ലംബോർഗിനിക്ക് വേണ്ടി ശ്രദ്ധ പൂജ കർമങ്ങൾ നടത്തുന്ന ചിത്രങ്ങളും വീഡിയോകളും പുറത്തുവന്നിട്ടുണ്ട്. പിങ്ക് സൽവാർ സ്യൂട്ട് ധരിച്ച് ഫെസ്റ്റിവൽ ലുക്കിലാണ് ശ്രദ്ധ.
തന്‍റെ പുതിയ റേഞ്ച് റോവർ എസ്‌വിക്കൊപ്പം നീല അനാർക്കലി വസ്‌ത്രത്തിലാണ് പൂജാ ഹെഗ്‌ഡെ തിളങ്ങുന്നത്. അമ്മ ലതാ ഹെഗ്‌ഡെ തയ്യാറാക്കിയ ദസറ വിരുന്നിന്‍റെ ഫോട്ടോകൾ നേരത്തെ താരം ഇൻസ്റ്റഗ്രാം സ്റ്റോറികളിൽ ആരാധകർക്കായി പങ്കുവച്ചിരുന്നു.