എറണാകുളം: മൻഹർ സിനിമാസിന്‍റെ ബാനറിൽ കൃഷ്‌ണ പ്രിയദർശൻ സംവിധാനം ചെയ്യുന്ന അനൂപ് മേനോൻ ചിത്രം ഒരു ശ്രീലങ്കൻ സുന്ദരി ഇൻ അബുദാബിയുടെ ട്രെയിലർ ലോഞ്ചും ഓഡിയോ പ്രകാശനവും കഴിഞ്ഞദിവസം കൊച്ചി ഐഎംഎ ഹാളിൽ നടന്നു.(Oru Srilankan Sundari In Abu Dhabi Trailer Out) സംവിധായിക കൃഷ്‌ണ പ്രിയദർശൻ തന്നെയാണ് ചിത്രത്തിന്‍റെ നിർമ്മാണവും രചനയും നിർവഹിക്കുന്നത്. ശ്രീലങ്കൻ സ്വദേശിയായ നായിക തന്‍റെ രണ്ടു കുട്ടികളുമായി അബുദാബിയിൽ ജീവിതം നയിക്കുന്നതാണ്‌ ചിത്രത്തിന്‍റെ കഥ.
നായികയുടെ രണ്ടു കുട്ടികളെ ചുറ്റിപ്പറ്റിയുള്ളതാണ് സിനിമയുടെ കഥ. ശ്രീലങ്കൻ വംശജരുടെ കഥ പറയുന്നതു കൊണ്ട്‌ തന്നെയാണ് ചിത്രത്തിന് ഒരു ശ്രീലങ്കൻ സുന്ദരി ഇൻ അബുദാബി എന്ന പേര് നൽകാൻ കാരണമായത്. നായക കഥാപാത്രമായി അനൂപ് മേനോൻ ചിത്രത്തിൽ എത്തുന്നുണ്ട്. മ്യൂസിക് വീഡിയോകളും ഷോർട്ട് ഫിലിമുകളും മാത്രം ചെയ്‌ത പരിചയവുമായി സിനിമ സംവിധാനം ചെയ്യാൻ എത്തിയപ്പോൾ നിരവധി വെല്ലുവിളികൾ നേരിട്ടതായി സംവിധായിക പറഞ്ഞു. ചിത്രത്തിന്‍റെ ചിത്രീകരണം ആരംഭിച്ച അഞ്ചുദിവസങ്ങൾക്കുള്ളിൽ തന്നെ സംവിധാന വഴികളെക്കുറിച്ച് കൂടുതൽ മനസ്സിലാക്കുവാൻ സാധിച്ചിരുന്നുവെന്നും അനൂപ് മേനോന്‍റെ പിന്തുണ കൊണ്ടാണ് സിനിമ പൂർത്തിയാക്കാൻ കഴിഞ്ഞതെന്നും കൃഷ്‌ണ പ്രിയദർശൻ പറഞ്ഞു.