ഹൈദരാബാദ്:ഇന്ത്യൻ സിനിമയ്ക്ക് ഓസ്‌കർ പുരസ്‌കാരം എന്ന മഹാ നേട്ടത്തിലേക്ക് നയിച്ച സിനിമ ‘ആർആർആർ’ ൽ കേന്ദ്ര കഥാപാത്രത്തെ അവതരിപ്പിച്ച് ലോകമട്ടാകെയുള്ള സിനിമ പ്രേമികളുടെ മനസിൽ ഇടം നേടിയ താരമാണ് രാം ചരൺ. ഇന്ന് 38-ാം ജന്മദിനം ആഘോഷിക്കുന്ന സൂപ്പർ താരത്തിന് ആശംസകളുമായി നിരവധി സെലിബ്രിറ്റികളാണ് സോഷ്യൽ മീഡിയയിൽ എത്തിയത്.
ആശംസകളുമായി മെഗാസ്റ്റാർ ചിരഞ്ജീവി: രാം ചരണിന്‍റെ അച്ഛനും തെന്നിന്ത്യൻ മെഗാസ്റ്റാറുമായ ചിരഞ്ജീവി, ജൂനിയർ എൻടിആർ, സാമന്ത റൂത്ത് പ്രഭു, രാകുൽ പ്രീത് സിംഗ് തുടങ്ങി നിരവധി പേരാണ് രാം ചരണ് ജന്മദിനാശംസകളുമായി എത്തിയത്. മകൻ്റെ കവിളിൽ ചുംബിക്കുന്ന ചിത്രം തൻ്റെ ട്വിറ്റർ ഹാൻഡിലിൽ പങ്കുവച്ചു കൊണ്ടാണ് ചിരഞ്ജീവി ജന്മദിനാശംസകൾ നേർന്നത്. ‘നിന്നെ കുറിച്ചോർത്ത് അഭിമാനിക്കുന്നു നാന്നാ’ എന്ന അടിക്കുറിപ്പോടെയാണ് ചിരഞ്ജീവി ട്വീറ്റ് ചെയ്‌തത്. ട്വീറ്റിൽ രാം ചരണെ ടാഗ് ചെയ്‌ത് ജന്മദിനാശംസകൾ നേരാനും പിതാവ് മറന്നില്ല.
പാൻ ഇന്ത്യൻ താരം സമാന്ത തന്‍റെ ഔദ്യോഗിക ഇൻസ്റ്റഗ്രാം ഹാൻഡിലിൻ്റെ സ്റ്റോറി വിഭാഗത്തിലാണ് രാം ചരണിന്‍റെ ചിത്രം പോസ്റ്റ് ചെയ്‌ത് ആശംസകൾ നേർന്നത്. ‘മറ്റുള്ളവരുടേതിൽ നിന്നും അസാധാരണമായ നിൻ്റെ യാത്ര അത് നീ തുടങ്ങുന്നേയുള്ളൂ, എപ്പോഴും കനിവോടെയും, ബഹുമാനത്തോടെയും പെരുമാറുന്ന നീ തന്നെ ഒരു ക്ലാസ് ആണ്. ജന്മദിനാശംസകൾ’ .. സമാന്ത കുറിച്ചു.
ധ്രുവയിലും ബ്രൂസ് ലീ: ദി ഫൈറ്ററിലും രാം ചരണിൻ്റെ നായികയായിരുന്ന രാകുൽ പ്രീത് സിംഗും ചരണിന് ആശംസകളുമായി തൻ്റെ ഇൻസ്റ്റഗ്രാമിലെത്തി. ധ്രുവ സിനിമയുടെ ഷൂട്ടിങ്ങിനിടയിൽ എടുത്ത ഒരു ചിത്രം പങ്കുവച്ചുകൊണ്ടായിരുന്നു രാകുൽ പ്രീതിൻ്റെ പോസ്റ്റ്. ഗ്ലോബൽ സ്റ്റാർ രാം ചരണ് എൻ്റെ ജന്മദിനാശംസകൾ. നിനക്ക് എല്ലാ വിജയങ്ങളും, ആരോഗ്യവും, വളർച്ചയും, സമാധാനവും നേരുന്നു.’ എന്നു കുറിച്ചുകൊണ്ടാണ് താരം ചരണിന് ആശംസയർപ്പിച്ചത്.
also read:ചിരിച്ചങ്ങലയില്‍ കണ്ണീര്‍ത്തുള്ളികള്‍ ഞാത്തിയിട്ട വേഷപ്പകര്‍ച്ചകള്‍; ഇന്നസെന്‍റിലൂടെ തന്നുള്ളിലേക്ക് നോക്കിയ മലയാളി
‘ആർആർആർ’ സിനിമയിലെ രാം ചരണിൻ്റെ സഹതാരവും തെന്നിന്ത്യൻ സൂപ്പർസ്റ്റാറുമായ ജൂനിയർ എൻടിആറും ചരണ് ജന്മദിനാശംസകൾ നേർന്ന് രംഗത്തെത്തി. ‘എൻ്റെ സഹോദരന് ജന്മദിനാശംസംകൾ, ഇന്ന് നീ അടിച്ചു പൊളിക്കുക’ എന്ന കുറിപ്പോടെയാണ് ജൂനിയർ എൻടിആർ തൻ്റെ ട്വിറ്റർ ഹാൻഡിലിലൂടെ രാം ചരണ് ആശംസയറിയിച്ചത്. രാം ചരണിൻ്റെ വരാനിരിക്കുന്ന ചിത്രമായ RC15 ൻ്റെ നിർമ്മാതാക്കൾ ചിത്രത്തിൻ്റെ മോഷൻ ടൈറ്റിൽ റിലീസ് ചെയ്തതോടെ ആഘോഷം ഇരട്ടിയാവുകയായിരുന്നു. ഷങ്കർ സംവിധാനം ചെയ്യുന്ന ചിത്രത്തിന് ഗെയിം ചേഞ്ചർ എന്നാണ് പേരിട്ടിരിക്കുന്നത്. രാം ചരണിനെ കൂടാതെ പൊളിറ്റിക്കൽ ആക്ഷൻ ഡ്രാമ വിഭാഗത്തിൽ വരുന്ന സിനിമയിൽ കിയാര അദ്വാനിയും പ്രധാന വേഷത്തിൽ എത്തുന്നു.
also read:പിറന്നാൾ ആഘോഷം ലണ്ടനില്‍, ആലിയയെ ചേർത്തുപിടിച്ച് രൺബീർ
