ആറ് സഹപാഠികളുടെ സംഭവബഹുലമായ പുനഃസംഗമത്തിന്‍റെ കഥ പറയുന്ന ചിത്രം 'നല്ല നിലാവുള്ള രാത്രി' (Nalla Nilavulla Raathri) യുടെ ടീസർ പുറത്ത്. ചിത്രം പ്രേക്ഷകർക്കരികിൽ എത്താൻ നാല് ദിവസം മാത്രം ബാക്കി നിൽക്കെ ആണ് ഇപ്പോൾ ടീസർ പുറത്തിറങ്ങിയിരിക്കുന്നത്. ഏതായാലും പ്രേക്ഷകരുടെ നെഞ്ചിടിപ്പേറ്റുന്ന, അവരെ തിയറ്ററുകളിലേക്ക് ആകർഷിക്കുന്ന ടീസർ തന്നെയാണിതെന്ന് നിസംശയം പറയാം.
നവാഗതനായ മർഫി ദേവസ്സി (Murphy Devassy) സംവിധാനം ചെയ്യുന്ന "നല്ല നിലാവുള്ള രാത്രി'യിൽ ചെമ്പൻ വിനോദ് ജോസ്, ഗണപതി, നിതിൻ ജോർജ്, സജിൻ ചെറുകയിൽ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. സാന്ദ്ര തോമസ് പ്രൊഡക്ഷന്‍സിന്‍റെ (Sandra Thomas Productions) ബാനറില്‍ സാന്ദ്ര തോമസും വില്‍സണ്‍ തോമസും ചേർന്നാണ് ചിത്രത്തിന്‍റെ നിർമാണം. സാന്ദ്ര തോമസ് പ്രൊഡക്ഷന്‍സിന്‍റെ ആദ്യ ചിത്രം കൂടിയാണിത്.
സംഘർഷഭരിതമായ മാസ് ആക്ഷൻ ത്രില്ലർ ആയിട്ടാണ് ചിത്രം അണിയിച്ചൊരുക്കിയിരിക്കുന്നത്. ഇപ്പോൾ ഇറങ്ങിയിരിക്കുന്ന ടീസറും ഇക്കാര്യത്തിലേക്ക് തന്നെയാണ് വിരൽ ചൂണ്ടുന്നത്. പ്രേക്ഷകരുടെ ഹൃദയമിടിപ്പ് കൂട്ടുന്ന ആക്ഷൻ രംഗങ്ങളാൽ സമ്പന്നമാണ് ചിത്രം.
'നല്ല നിലാവുള്ള രാത്രി' ആറ് സഹപാഠികളുടെ സംഭവബഹുലമായ പുനഃസമാഗമത്തിന്‍റെ കഥയാണ് പറയുന്നതെന്ന് അണിയറക്കാർ നേരത്തെ വ്യക്തമാക്കിയിരുന്നു. ആറ് സുഹൃത്തുക്കള്‍ വര്‍ഷങ്ങള്‍ക്ക്‌ ശേഷം ഷിമോഗയില്‍ ഒത്തുകൂടുന്നതും തുടര്‍ന്നുണ്ടാകുന്ന സംഭവങ്ങളിലൂടെയുമാണ് കഥ വികസിക്കുന്നത്. ഈ കഥ എഴുതുമ്പോള്‍ ഒരു യഥാര്‍ഥ സംഭവം സ്വാധീനിച്ചു എന്ന് സംവിധായകന്‍ നേരത്തെ പറഞ്ഞിരുന്നു.
മനസുകളിലെ നിഗൂഢതകളിലൂടെ പറയുന്ന കഥയാണ് 'നല്ല നിലാവുള്ള രാത്രി'യെന്നും അദ്ദേഹം പറയുന്നു. 'സിനിമയിൽ കുറച്ചുകാര്യങ്ങള്‍ സംഭവിക്കുന്നുണ്ട്. ഈ പേരിലേക്ക് വന്നത് അങ്ങനെയാണ്. ഒരേ കോളജില്‍ സഹപാഠികളായിരുന്ന സീനിയേഴ്‌സും ജൂനിയേഴ്‌സുമായ സുഹൃത്തുക്കളുടെ പുനഃസംഗമവും തുടര്‍ന്നുണ്ടാകുന്ന പ്രശ്‌നങ്ങളുമാണ് ചിത്രത്തിന്‍റെ പ്രമേയം'- സിനിമയുടെ റിലീസുമായി ബന്ധപ്പെട്ട് ഒരു മാധ്യമത്തിന് നല്‍കിയ അഭിമുഖത്തിൽ സംവിധായകന്‍ പറഞ്ഞുവയ്‌ക്കുന്നു. അത്യാഗ്രഹം, ചതി, വഞ്ചന, ഈഗോ എന്നിവയിലൂടെയുമെല്ലാം സിനിമ സഞ്ചരിക്കുന്നു.
സംവിധായകൻ മർഫി ദേവസ്സിയും പ്രഫുൽ സുരേഷുമാണ് 'നല്ല നിലാവുള്ള രാത്രി'യുടെ തിരക്കഥയും സംഭാഷണവും ഒരുക്കിയത്. അജയ് ഡേവിഡ് കാച്ചപ്പിള്ളി ആണ് ചിത്രത്തിന്‍റെ ഛായാഗ്രഹണം. കൈലാസ് ആണ് ചിത്രത്തിലെ ഗാനങ്ങൾക്ക് സംഗീതം നല്‍കിയിരിക്കുന്നത്. ജൂൺ 30 വെള്ളിയാഴ്‌ച ചിത്രം തിയേറ്ററുകളിൽ എത്തും.
ചിത്രത്തിന്‍റെ എഡിറ്റിങ് ശ്യാം ശശിധരൻ ആണ്. പ്രൊഡക്ഷൻ കൺട്രോളർ - ഡേവിഡ്സൺ സി ജെ, ക്രിയേറ്റിവ് ഹെഡ് - ഗോപിക റാണി, സംഗീത സംവിധാനം - കൈലാസ്, ആക്ഷന്‍ കൊറിയോഗ്രഫി - രാജശേഖരൻ, കലാസംവിധാനം - ത്യാഗു തവനൂർ, വസ്‌ത്രാലങ്കാരം - അരുൺ മനോഹർ, മേക്കപ്പ് - അമൽ, ചീഫ് അസോസിയേറ്റ് ഡയറക്ടര്‍ - ദിനിൽ ബാബു, സൗണ്ട് ഡിസൈൻ - വിഷ്‌ണു ഗോവിന്ദ്, മാർക്കറ്റിങ് പ്ലാനിങ് - ഒബ്സ്ക്യുറ എന്‍റർടെയ്‌ൻമെന്‍റ്, ഡിസൈൻ - യെല്ലോടൂത്ത് എന്നിവരാണ് ചിത്രത്തിലെ മറ്റ് അണിയറ പ്രവർത്തകർ.
READ ALSO:'മനസ്സുകളിലെ നിഗൂഢതകളിലൂടെ പറയുന്ന കഥ, ആ 8 പേരില്‍ ഒരാള്‍ നമ്മളാവാം' ; 'നല്ല നിലാവുള്ള രാത്രി' ഉടന്‍ തിയേറ്ററുകളില്‍
