മോഹന്‍ലാല്‍ - ഷാജി കൈലാസ് കൂട്ടുകെട്ടിലൊരുങ്ങിയ ചിത്രം 'എലോണ്‍' നാളെ (ജനുവരി 26) തിയേറ്ററുകളില്‍. ചിത്രത്തിന്‍റെ 30 സെക്കന്‍ഡ്‌ ദൈര്‍ഘ്യമുള്ള ടീസര്‍ ഇതിനകം പുറത്തുവന്നിട്ടുണ്ട്. മോഹന്‍ലാലിന്‍റെ കഥാപാത്രത്തിന്‍റെ ലക്ഷ്യത്തെയാണ് ഇതില്‍ ഹൈലൈറ്റ് ചെയ്‌തിരിക്കുന്നത്.
കയോസ് സിദ്ധാന്തത്തില്‍ പറയുന്ന ബട്ടര്‍ഫ്ലൈ ഇഫക്‌ട് ഒരു ഉദാഹരണമായി ടീസറില്‍ കാണിക്കുന്നുണ്ട്. നിഗൂഢമായ ചില ശബ്‌ദങ്ങളുടെ പിന്നിലെ രഹസ്യം തേടി താന്‍ ഇറങ്ങുകയാണെന്ന് മോഹന്‍ലാല്‍ കഥാപാത്രം പറയുന്നു. മുമ്പിറങ്ങിയ ടീസറില്‍ മറ്റ് താരങ്ങളുടെ ശബ്‌ദ സാന്നിധ്യം ഉണ്ടായിരുന്നെങ്കില്‍ പുതിയതില്‍ മോഹന്‍ലാലിന്‍റേത് മാത്രമാണുള്ളത്.
സമീപകാല ചിത്രങ്ങളില്‍ നിന്ന് വേറിട്ട ഗെറ്റപ്പിലാണ് 'എലോണി'ല്‍ മോഹന്‍ലാല്‍ പ്രത്യക്ഷപ്പെടുന്നത്. ഹെയര്‍സ്‌റ്റൈലിലും വസ്‌ത്രധാരണത്തിലുമൊക്കെ വ്യത്യസ്‌തമായാണ് താരമെത്തുന്നത്. സിനിമയ്‌ക്ക് ക്ലീന്‍ യു സര്‍ട്ടിഫിക്കറ്റ് ലഭിച്ചിട്ടുണ്ട്.