സുരേഷ്‌ ഗോപിയെ നായകനാക്കി ജിബു ജേക്കബ് സംവിധാനം ചെയ്യുന്ന ബിഗ് ബജറ്റ് ചിത്രത്തിന്‍റെ പേര് പ്രഖ്യാപിച്ചു. 'മേ ഹൂം മൂസ' എന്ന് പേര് നൽകിയിരിക്കുന്ന പാൻ ഇന്ത്യൻ ചിത്രത്തിൽ വ്യത്യസ്‌ത ഗെറ്റപ്പുകളിലാണ് താരം എത്തുന്നത്. ചിത്രത്തിന്‍റെ ഷൂട്ടിങ് കൊടുങ്ങല്ലൂരിൽ ആരംഭിച്ചിരുന്നു. സുരേഷ്‌ ഗോപിയുടെ 253-ാം ചിത്രം കൂടിയാണിത്.
കോണ്‍ഫിഡന്‍റ് ഗ്രൂപ്പും തോമസ് തിരുവല്ല പ്രൊഡക്‌ഷൻസും ചേർന്ന് നിർമ്മിക്കുന്ന ചിത്രത്തിന്‍റെ കഥ, തിരക്കഥ, സംഭാഷണം എന്നിവ ഒരുക്കുന്നത് റുബീഷ് റെയ്‌നാണ്. പൂനം ബജ്‌വയാണ് നായിക. സൈജു കുറുപ്പ്, ഹരീഷ് കണാരൻ തുടങ്ങിയ താരങ്ങളും ചിത്രത്തിൽ പ്രധാന വേഷം കൈകാര്യം ചെയ്യുന്നു.