ചെന്നൈ :2021ലെ തമിഴ് ഹിറ്റ് ചലച്ചിത്രം കർണന് ശേഷം സൂപ്പർ സ്റ്റാർ ധനുഷുമായി വീണ്ടും കൈകോർത്ത് സംവിധായകൻ മാരി സെൽവരാജ്. നാല് വർഷത്തെ ഇടവേളയ്ക്ക് ശേഷം ധനുഷിൻ്റെ ഉടമസ്ഥതയിലുള്ള വണ്ടർബാർ ഫിലിംസാണ് പുതിയ സിനിമയുടെ നിർമ്മാണം ഏറ്റെടുത്തിരിക്കുന്നത്. മാരി സെൽവരാജും ധനുഷും ഒരുമിച്ച ‘കർണ്ണൻ’ ഏറെ പ്രേക്ഷക പ്രീതി നേടിയ പൊളിറ്റിക്കൽ ഡ്രാമയായിരുന്നു.
അടിച്ചമർത്തപ്പെട്ട ഗ്രാമത്തിൻ്റെ അനീതിക്കെതിരായ തീവ്രമായ പോരാട്ടത്തെക്കുറിച്ചുള്ള കഥയാണ് ‘കർണ്ണൻ’ പറയുന്നത്.രജിഷ വിജയൻ, നടരാജൻ സുബ്രഹ്മണ്യം, ലാൽ, യോഗി ബാബു, ഗൗരി ജി കിഷൻ, ലക്ഷ്മി പ്രിയ ചന്ദ്രമൗലി എന്നിവർ പ്രധാന വേഷങ്ങളിൽ എത്തിയ സിനിമ മികച്ച വിജയമാണ് കാഴ്‌ചവച്ചത്. ബ്ലോക്ക് ബസ്റ്റർ സിനിമയ്ക്കു‌ശേഷം ഇരുവരും വീണ്ടും ഒന്നിക്കുമ്പോൾ പ്രേക്ഷകരുടെ പ്രതീക്ഷ ഏറെയാണ്.
കർണ്ണൻ്റെ രണ്ടാം വാർഷികത്തോട് അനുബന്ധിച്ച് പുറത്തുവിട്ട അനൗൺസ്‌മെൻ്റ് പോസ്റ്റർ : കർണ്ണൻ്റെ രണ്ടാം വാർഷികത്തോട് അനുബന്ധിച്ചാണ് ഇപ്പോൾ സിനിമയുടെ പ്രഖ്യാപനം നടത്തിയിരിക്കുന്നത്. തൻ്റെ അരങ്ങേറ്റ ചിത്രമായ ‘പരിയേറും പെരുമാളി’ലൂടെ തന്നെ ഏറെ ശ്രദ്ധ നേടിയ സംവിധായകനാണ് മാരി സെൽവരാജ്. സെൽവരാജിനൊപ്പം വീണ്ടും ധനുഷ് ഒന്നിക്കുന്നുവെന്ന വാർത്ത ഇതിനോടകം തന്നെ സോഷ്യൽ മീഡിയയിൽ തരംഗം സൃഷ്‌ടിച്ചിരിക്കുകയാണ്.
സിനിമയുടെ അനൗൺസ്‌മെൻ്റ് പോസ്റ്ററും ധനുഷിന് പൂച്ചെണ്ട് നൽകി കൊണ്ടുള്ള ചിത്രവും തൻ്റെ ഔദ്യോഗിക ട്വിറ്റർ ഹാൻഡിലൂടെ പങ്കുവച്ചുകൊണ്ടാണ് സംവിധായകൻ സിനിമയെ പറ്റി പുറം ലോകത്തെ അറിയിച്ചത്. ‘കർണ്ണൻ്റെ റിലീസിന്‍റെ വാര്‍ഷിക ദിവസം തന്നെ ഈ സിനിമയും പ്രഖ്യാപിക്കാൻ കഴിഞ്ഞതിൽ ഏറെ സന്തോഷമുണ്ട്. ഒരു തവണകൂടി ധനുഷ് സാറുമായി കൈകോർത്തതിലും ഞാൻ സന്തോഷിക്കുന്നു’ - എന്ന അടിക്കുറിപ്പോടെയാണ് സംവിധായകൻ ചിത്രം പോസ്റ്റ് ചെയ്‌തത്.