മലയാളികളുടെ പ്രിയതാരം മംമ്ത മോഹൻദാസ് (Mamta Mohandas) നായികയായി തെലുഗു ചിത്രം ഒരുങ്ങുന്നു. അജയ് സാമ്രാട്ട് (Ajay Samrat) സംവിധാനം ചെയ്യുന്ന 'രുദ്രാംഗി' (Rudrangi) എന്ന ചിത്രത്തിലാണ് താരം നായികയായി എത്തുന്നത്. ചിത്രത്തിന്‍റെ ട്രെയിലര്‍ പുറത്തുവന്നു.
27 ലക്ഷത്തിലധികം പേരാണ് കഴിഞ്ഞ ദിവസം പുറത്തുവന്ന ചിത്രത്തിന്‍റെ ട്രെയിലർ യൂട്യൂബിൽ ഇതിനോടകം കണ്ടത്. ചിത്രത്തില്‍ 'റാണി ജ്വാല ഭായി'യായാണ് മംമ്ത എത്തുന്നത്. ചരിത്ര പശ്ചാത്തലത്തില്‍ ഒരുക്കിയിരിക്കുന്ന ചിത്രത്തില്‍ മമ്തയുടെ അത്യുഗ്രൻ ആക്ഷൻ രംഗങ്ങളുമുണ്ടാകുമെന്ന് ട്രെയിലറില്‍ നിന്നും വ്യക്തമാണ്.
മമ്തയെ കൂടാതെ ജഗപതി ബാബു, വിമല രാമൻ, ആശിഷ് ഗാന്ധി എന്നിവരും 'രുദ്രാംഗി'യില്‍ പ്രധാന വേഷത്തില്‍ എത്തുന്നു. ജഗപതി ബാബുവിന്‍റെ വില്ലൻ കഥാപാത്രവും ട്രെയിലറില്‍ മുഴച്ചു നിൽക്കുന്നുണ്ട്. രാസമായി ബാലകിഷൻ നിര്‍മിക്കുന്ന ചിത്രം ജൂലൈ ഏഴിന് പ്രദർശനത്തിനെത്തും.
ചിത്രത്തിനായി തിരക്കഥ രചിച്ചിരിക്കുന്നതും സംവിധായകൻ അജയ് സാമ്രാട്ട് തന്നെയാണ്. സന്തോഷ് ഷനമോണിയാണ് ചിത്രത്തിന്‍റെ ഛായാഗ്രാഹകൻ. ഭാനു, അജയ് എന്നിവരാണ് നൃത്തസംവിധാനം.
അതേസമയം 'കേഡി' എന്ന ചിത്രത്തിലൂടെയാണ് മംമ്ത മോഹൻദാസ് തെലുഗു സിനിമ രംഗത്ത് അരങ്ങേറ്റം കുറിക്കുന്നത്. കിരണ്‍ കുമാർ സംവിധാനം ചെയ്‌ത ഈ ആക്ഷൻ ചിത്രത്തിൽ നാഗാര്‍ജുനയായിരുന്നു നായകൻ. 'ജാനകി' എന്ന കഥാപാത്രത്തെയാണ് മംമ്ത ചിത്രത്തിൽ അവതരിപ്പിച്ചത്.
'കിംഗ് ഓഫ് കൊത്ത' ടീസർ റിലീസ് ഇന്ന്:ദുൽഖർ സൽമാൻ നായകനാകുന്നചിത്രം 'കിംഗ് ഓഫ് കൊത്ത'യുടെ ടീസര്‍ ഇന്ന് (ബുധനാഴ്‌ച) വൈകിട്ട് ആറ് മണിക്ക് റിലീസ് ചെയ്യും. മെഗാ സ്റ്റാർ മമ്മൂട്ടിയാണ് ചിത്രത്തിന്‍റെ മലയാളം ടീസർ പുറത്തുവിടുക. ചിത്രത്തിന്‍റെ തെലുഗു ടീസര്‍ മഹേഷ് ബാബുവും തമിഴ് ടീസര്‍ ചിമ്പുവും കന്നഡ ടീസര്‍ രക്ഷിത് ഷെട്ടിയും റിലീസ് ചെയ്യുമെന്നാണ് അണിയറ പ്രവര്‍ത്തകര്‍ അറിയിച്ചിരിക്കുന്നത്.