മമ്മൂട്ടി ആരാധകര്‍ നാളേറെയായി ആകാംക്ഷയോടെ കാത്തിരിക്കുന്ന ചിത്രമാണ് 'കാതല്‍ ദി കോര്‍'. പ്രഖ്യാപനം മുതല്‍ മാധ്യമ ശ്രദ്ധ നേടിയ സിനിമയുടെ ഓരോ പുതിയ അപ്‌ഡേറ്റുകളും ആരാധകര്‍ സ്വീകരിക്കാറുണ്ട്. ഇപ്പോഴിതാ ചിത്രത്തിന്‍റെ റിലീസുമായി ബന്ധപ്പെട്ട് ഒരു പുതിയ വിവരമാണ് പുറത്തുവരുന്നത്.
ജിയോ ബേബി സംവിധാനം ചെയ്യുന്ന സിനിമയുടെ റിലീസ് മാറ്റിവെച്ചേക്കുമെന്നാണ് റിപ്പോര്‍ട്ടകള്‍. നേരത്തെ മെയ്‌ 14ന് റിലീസ് ചെയ്യാനായിരുന്നു നിശ്ചയിച്ചിരുന്നത്. സിനിമയുടെ ചിത്രീകരണം ഇതിനോടകം തന്നെ പൂര്‍ത്തിയായിരുന്നു. 34 ദിവസം കൊണ്ടാണ് 'കാതല്‍ ദി കോറി'ന്‍റെ ചിത്രീകരണം പൂര്‍ത്തീകരിച്ചത്.
സിനിമയില്‍ മാത്യു ദേവസി എന്ന കഥാപാത്രത്തെയാണ് മമ്മൂട്ടി അവതരിപ്പിക്കുക. ചിത്രത്തിലെ മമ്മൂട്ടിയുടെ ക്യാരക്‌ടര്‍ പോസ്‌റ്റര്‍ ഇതിനോടകം തന്നെ സോഷ്യല്‍ മീഡിയയില്‍ വൈറലായിരുന്നു. തീക്കോയി ഗ്രാമ പഞ്ചായത്തിലെ ഇടതു സ്വതന്ത്ര സ്ഥാനാര്‍ഥിയായി മത്സരിക്കുന്ന മാത്യു ദേവസിയുടെ പോസ്‌റ്ററാണ് സോഷ്യല്‍ മീഡിയയില്‍ തരംഗമായത്.
ജ്യോതികയാണ് ചിത്രത്തില്‍ മമ്മൂട്ടിയുടെ നായികയായെത്തുക. മമ്മൂട്ടിയും ജ്യോതികയും ഇതാദ്യമായാണ് ഒന്നിച്ചെത്തുന്നത്. 12 വര്‍ഷങ്ങള്‍ക്ക് ശേഷം മലയാളത്തിലേയ്‌ക്കുള്ള ജ്യോതികയുടെ തിരിച്ചുവരവ് കൂടിയാണീ ചിത്രം. ലാലു അലക്‌സ്‌, സുധി കോഴിക്കോട്, മുത്തുമണി, ചിന്നു ചാന്ദിനി, ആദര്ശ് സുകുമാരന്‍, അനഘ അക്കു, ജോസി സിജോ തുടങ്ങിയവരും ചിത്രത്തില്‍ അണിനിരക്കുന്നുണ്ട്.
'ദി ഗ്രേറ്റ് ഇന്ത്യന്‍ കിച്ചന്‍', 'ഫ്രീഡം ഫൈറ്റ്', 'കിലോമീറ്റേഴ്‌സ്‌ ആന്‍ഡ് കിലോമീറ്റേഴ്‌സ്‌', 'കുഞ്ഞു ദൈവം', രണ്ടു പെണ്‍കുട്ടികള്‍' എന്നീ ചിത്രങ്ങള്‍ക്ക് ശേഷം ജിയോ ബേബി ഒരുക്കുന്ന ചിത്രം കൂടിയാണ് 'കാതല്‍'.