മെഗാസ്‌റ്റാര്‍ മമ്മൂട്ടിക്ക് സുവര്‍ണ വര്‍ഷമാണ് 2023. ലിജോ ജോസ്‌ പെല്ലിശ്ശേരിയുടെ 'നന്‍പകല്‍ നേരത്ത് മയക്ക'ത്തിന് ശേഷമുള്ള മമ്മൂട്ടിയുടെ പുതിയ ചിത്രമാണ് 'ഏജന്റ്'. തെന്നിന്ത്യന്‍ യുവ താരം അഖില്‍ അക്കിനേനി നായകനായി എത്തുന്ന തെലുഗു ചിത്രത്തില്‍ മമ്മൂട്ടിയും സുപ്രധാന വേഷത്തിലാണ് എത്തുന്നത്.
ചിത്രത്തിലെ മമ്മൂട്ടിയുടെ പോസ്‌റ്ററാണ് നിര്‍മാതാക്കള്‍ പങ്കുവച്ചിരിക്കുന്നത്. ഒരു പട്ടാള ഉദ്യോഗസ്ഥന്‍റെ വേഷത്തിലാണ് ചിത്രത്തില്‍ മമ്മൂട്ടി പ്രത്യക്ഷപ്പെട്ടിരിക്കുന്നത്. കൂടാതെ ഏജന്‍റിലെ മമ്മൂട്ടിയുടെ സ്‌റ്റില്ലുകളും സോഷ്യല്‍ മീഡിയയില്‍ ശ്രദ്ധ നേടുകയാണ്.
നേവി ബ്ലൂ നിറത്തിലുള്ള ഷര്‍ട്ടും ബ്രൗണ്‍ നിറമുള്ള പാന്‍റ്‌സും, ബുള്ളറ്റ് പ്രൂഫും, തൊപ്പിയും ധരിച്ച് കയ്യില്‍ തോക്കുമായി നില്‍ക്കുന്ന മമ്മൂട്ടിയെയാണ് ചിത്രത്തില്‍ കാണാനാവുക. ഒരു സ്‌പൈ ത്രില്ലറായി ഒരുങ്ങുന്ന ചിത്രത്തില്‍ മഹാദേവ് എന്ന സൈനിക ഉദ്യോഗസ്ഥനെയാണ് മമ്മൂട്ടി അവതരിപ്പിക്കുക. ആക്ഷന് ഏറെ പ്രാധാന്യമുള്ള ചിത്രത്തില്‍ വന്‍ മേക്കോവറിലാണ് അഖില്‍ അക്കിനേനി പ്രത്യക്ഷപ്പെടുന്നത്.