തിരുവനന്തപുരം : സ്റ്റീരിയോടൈപ്പുകളെയും നായക സങ്കൽപ്പങ്ങളെയും മാറ്റിമറിച്ച നടൻ, മലയാള സിനിമയുടെ കാരണവർ, മധു. മലയാളികൾക്ക് കഥകളുടെ സർഗ വസന്തം തീർത്ത ഇതിഹാസ എഴുത്തുകാരൻ എംടി വാസുദേവൻ നായർ. നവതിയിലെത്തിയ മലയാളത്തിന്‍റെ ഈ അതുല്യ പ്രതിഭകളുടെ അപൂർവ ജീവിത ചിത്രങ്ങളും വിവിധ സിനിമകളുടെ ചിത്രീകരണ കാഴ്‌ചകളും ചേർത്ത് 28-ാമത് രാജ്യാന്തര ചലച്ചിത്ര മേളയിൽ ഒരുക്കിയ ചിത്രപ്രദർശനം നമ്മെ കൂട്ടിക്കൊണ്ടുപോവുക 60കളിലെ സിനിമാവസന്തത്തിലേക്ക് (Photo exhibition of Madhu and MT Vasudevan Nair).
'ചെമ്മീനി'ലെ പരീക്കുട്ടിയും 'ആദ്യ കിരണങ്ങളി'ലെ പാപ്പച്ചനും 'മുറപ്പെണ്ണി'ലെ ചന്ദ്രനും 'കാട്ടുപൂക്കളി'ലെ ജോണിയും 'സുബൈദ'യിലെ മമ്മുവും 'ഓളവും തീരവും' എന്ന ചിത്രത്തിലെ ബാപ്പുട്ടിയും... ഇങ്ങനെ മലയാള സിനിമയുടെ ഫ്രെയിമുകളിലൂടെ മധു എന്ന പ്രതിഭ ജീവിച്ച ഓരോ അസുലഭ മുഹൂർത്തങ്ങളും ഇന്നും മലയാളി പ്രേക്ഷകരുടെ മനസിൽ മായാതെ നിൽക്കുന്നു. പ്രണയവും വിരഹവും ദുഃഖവും സന്തോഷവും അത്ഭുതവും ഭയവും മിന്നിമറയുന്ന ഭാവങ്ങൾ.
നോവലിസ്റ്റ്‌, തിരക്കഥാകൃത്ത്‌, ചലച്ചിത്രസംവിധായകൻ, സാഹിത്യകാരൻ, നാടകകൃത്ത് എന്നീ നിലകളിലെല്ലാം വ്യക്തിമുദ്ര പതിപ്പിച്ച എംടിയുടെ മലയാള കഥയുടെയും നോവലിന്‍റെയും സിനിമ സാഹിത്യത്തിന്‍റെയും അശ്വമേധകാലവും കാണികൾക്ക് മുന്നിലിതാ. ഇരുവരുടെയും 90 ജീവിത കാഴ്‌ചകളാണ് ടാഗോർ തിയേറ്റർ പരിസരത്ത് ആരംഭിച്ച ചിത്രപ്രദർശനത്തിൽ ഉൾപ്പെടുത്തിയിരിക്കുന്നത്.
35 വർഷമായി ഇരുവരുടെയും ചിത്രങ്ങൾ പകർത്തുന്ന ചലച്ചിത്ര ചരിത്രകാരനും ഫോട്ടോഗ്രാഫറുമായ ആർ ഗോപാലകൃഷ്‌ണൻ ആണ് ക്യൂറേറ്റർ. സംവിധായകനും ഗാനരചയിതാവുമായ ശ്രീകുമാരൻ തമ്പിയാണ് ചിത്രപ്രദർശനം ഉദ്ഘാടനം ചെയ്‌തത്. മേള അവസാനിക്കുന്നതുവരെ ചിത്രപ്രദർശനം ഉണ്ടാകും. ഗോപാലകൃഷ്‌ണൻ എടുത്ത ചിത്രങ്ങളും അദ്ദേഹത്തിന്‍റെ ശേഖരത്തിലുള്ള ചിത്രങ്ങളുമാണ് പ്രദർശനത്തിൽ ഉൾപ്പെടുത്തിയിരിക്കുന്നത്.