കേരളം ഒറ്റക്കെട്ടായി പൊരുതി അതീജിവിച്ച നൂറ്റാണ്ടിന്‍റെ പ്രളയം ആസ്‌പദമാക്കിയുളള ജൂഡ് ആന്‍റണി ജോസഫ് സിനിമയുടെ ടീസര്‍ പുറത്ത്. 2018 എന്ന് പേരിട്ടിരിക്കുന്ന ചിത്രത്തിന്‍റെ ആകാംഷയുണര്‍ത്തുന്ന ടീസറാണ് റിലീസ് ചെയ്‌തിരിക്കുന്നത്. പ്രളയ സമയത്തുണ്ടായ നടുക്കുന്ന ദൃശ്യങ്ങളും ജനങ്ങള്‍ അനുഭവിച്ച മാനസിക സംഘര്‍ഷങ്ങളുമെല്ലാം ടീസറില്‍ കാണിക്കുന്നുണ്ട്.
'എവരിവണ്‍ ഈസ് എ ഹീറോ' എന്നാണ് ചിത്രത്തിന്‍റെ ടാഗ്‌ലൈന്‍. ടൊവിനോ തോമസ്, കുഞ്ചാക്കോ ബോബന്‍, ആസിഫ് അലി, ഇന്ദ്രന്‍സ്, ലാല്‍, വിനീത് ശ്രീനിവാസന്‍, നരേന്‍, അജു വര്‍ഗീസ്, അപര്‍ണ ബാലമുരളി, ശിവദ, തന്‍വി റാം ഉള്‍പ്പെടെ വമ്പന്‍ താരനിരയാണ് സിനിമയിലുളളത്. കാവ്യ ഫിലിംസ്, പികെ പ്രൈം പ്രൊഡക്ഷന്‍ എന്നീ ബാനറുകളില്‍ വേണു കുന്നപ്പിളളി, ആന്‍റോ ജോസഫ്, സികെ പത്മകുമാര്‍ എന്നിവര്‍ ചേര്‍ന്നാണ് നിര്‍മാണം.