മെഗാസ്‌റ്റാര്‍ മമ്മൂട്ടിയുടെ (Mammootty) ഏറ്റവും പുതിയ റിലീസായ 'കണ്ണൂര്‍ സ്‌ക്വാഡി'ലെ വീഡിയോ ഗാനം പുറത്തിറങ്ങി (Kannur Squad song). ചിത്രത്തിലെ 'കാലന്‍ പുലി കതറണ് കതറണ്' എന്ന ഗാനത്തിന്‍റെ വീഡിയോ ആണ് അണിയറപ്രവര്‍ത്തകര്‍ പുറത്തുവിട്ടത് (Kaalan Puli video song).
സിനിമയില്‍ മമ്മൂട്ടി അവതരിപ്പിക്കുന്ന എഎസ്‌ഐ ജോര്‍ജ് മാര്‍ട്ടിന്‍ എന്ന കഥാപാത്രത്തിന്‍റെ ഇന്‍ട്രോ ഗാനം കൂടിയാണിത്. വിനായക് ശശികുമാറിന്‍റെ വരികള്‍ക്ക് സുഷിന്‍ ശ്യാമാണ് സംഗീതം നല്‍കിയിരിക്കുന്നത്. അമല്‍ ജോസ്, സുഷിന്‍ ശ്യാം എന്നിവര്‍ ചേര്‍ന്നാണ് ആലാപനം. വ്യത്യസ്‌തമായ രീതിയിലാണ് ഈ ഗാനം ഒരുക്കിയിരിക്കുന്നത്.
'കണ്ണൂര്‍ സ്‌ക്വാഡി'ലെ രണ്ടാമത്തെ ഗാനമാണിത്. നേരത്തെ ചിത്രത്തിലെ 'മൃദുഭാവേ ദൃഢകൃത്യേ' എന്ന ഗാനത്തിന്‍റെ ലിറിക്കല്‍ വീഡിയോയും അണിയറപ്രവര്‍ത്തകര്‍ പുറത്തു വിട്ടിരുന്നു (Kannur Squad second song). വിനായക് ശശികുമാറിന്‍റെ ഗാനരചനയില്‍ സുഷിൻ ശ്യാം ആയിരുന്നു ഈ ഗാനവും ആലപിച്ചത്.
Also Read:Vineeth Kalyani About Kannur Squad 'എന്തൊരു സിനിമ! മമ്മൂട്ടി അങ്കിൾ ആശ്ചര്യപ്പെടുത്തുന്നത് തുടരുന്നു'; പ്രശംസിച്ച് വിനീതും കല്യാണിയും
സെപ്‌റ്റംബര്‍ 28നാണ് 'കണ്ണൂര്‍ സ്ക്വാഡ്' തിയേറ്ററുകളില്‍ എത്തിയത്. പ്രദര്‍ശന ദിനം മുതല്‍ ചിത്രത്തിന് മികച്ച പ്രതികരണമാണ് തിയേറ്ററുകളില്‍ നിന്നും ലഭിച്ചത്. മലയാള സിനിമയില്‍ മികച്ച ഓപ്പണിങ് കലക്ഷന്‍ നേടി ബോക്‌സോഫിസില്‍ മികച്ച അക്കങ്ങള്‍ സൃഷ്‌ടിക്കാന്‍ 'കണ്ണൂര്‍ സ്‌ക്വാഡിന്' കഴിഞ്ഞു. ആഗോള ബോക്‌സോഫിസില്‍ 75 കോടി രൂപയാണ്‌ ചിത്രം ഇതുവരെ കലക്‌ട്‌ ചെയ്‌തത്.
ചിത്രം 50 കോടി ക്ലബില്‍ ഇടംപിടിച്ച സാഹചര്യത്തില്‍ സിനിമയുടെ മികച്ച വിജയം ആഘോഷിച്ച് 'കണ്ണൂര്‍ സ്ക്വാഡ്' ടീം രംഗത്തെത്തിയിരുന്നു. ഈ സാഹചര്യത്തില്‍ 'കണ്ണൂര്‍ സ്‌ക്വാഡി'ന്‍റെ സക്‌സസ്‌ ടീസര്‍ അണിയറപ്രവര്‍ത്തകര്‍ പുറത്തുവിട്ടിരുന്നു (Kannur Squad success teaser). സിനിമയിലെ പ്രധാന രംഗങ്ങളില്‍ ഒന്നായ തിക്രി ഗ്രാമത്തിലെ സംഘട്ടന രംഗങ്ങള്‍ കോര്‍ത്തിണക്കിയതായിരുന്നു 'കണ്ണൂര്‍ സ്‌ക്വാഡി'ന്‍റെ സസ്‌കസ് ടീസര്‍. 36 സെക്കന്‍ഡുകള്‍ മാത്രം ദൈര്‍ഘ്യമുള്ളതാണ് സസ്‌കസ് ടീസര്‍.
Also Read:Mammootty Kannur Squad Movie ശത്രുക്കളെ അടിച്ചു തുരത്തി മമ്മൂട്ടിയും ടീമും; കണ്ണൂര്‍ സ്ക്വാഡ് സക്‌സസ്‌ ടീസര്‍ പുറത്ത്
സസ്‌കസ് ടീസറിന് ഒടുവിലായി 'കണ്ണൂര്‍ സ്‌ക്വാഡി'നെ സ്വീകരിച്ച പ്രേക്ഷകര്‍ക്ക് ടീം നന്ദിയും രേഖപ്പെടുത്തുന്നുണ്ട്. ഒപ്പം മലയാള സിനിമകളെ ഇനിയും പിന്തുണയ്‌ക്കണമെന്നും 'കണ്ണൂര്‍ സ്ക്വാഡ്' ടീം പരാമര്‍ശിക്കുന്നുണ്ട്. മമ്മൂട്ടി കമ്പനിയുടെ ഔദ്യോഗിക യൂട്യൂബ്‌ ചാനലിലൂടെയാണ് സസ്‌കസ് ടീസര്‍ റിലീസ് ചെയ്‌തത്.
ഒമ്പത് ദിവസം കൊണ്ടാണ് ചിത്രം ആഗോള തലത്തില്‍ 50 കോടി ക്ലബില്‍ ഇടംപിടിച്ചത്. ചിത്രം 50 കോടി ക്ലബില്‍ ഇടംപിടിച്ച വേളയില്‍ സിനിമയെ അഭിനന്ദിച്ച് ദുല്‍ഖര്‍ സല്‍മാനും രംഗത്തെത്തിയിരുന്നു. ഫേസ്‌ബുക്കിലൂടെയാണ് ദുല്‍ഖര്‍ സല്‍മാന്‍ അഭിനന്ദനം അറിയിച്ചത്.
'കണ്ണൂര്‍ സ്‌ക്വാഡിന്‍റെ എല്ലാ ടീം അംഗങ്ങള്‍ക്കും എന്‍റെ ഹൃദയം നിറഞ്ഞ അഭിനന്ദനങ്ങള്‍. ഒപ്പം സിനിമയ്‌ക്ക് നല്‍കുന്ന അനന്തമായ സ്‌നേഹത്തിന് പ്രേക്ഷകരോട് വലിയ നന്ദി' -ഇപ്രകാരമാണ് ദുല്‍ഖര്‍ സല്‍മാന്‍ കുറിച്ചത്.
Also Read:Kannur Squad Enters 50 Crore Club: കണ്ണൂര്‍ സ്ക്വാഡ് 50 കോടി ക്ലബില്‍; വാപ്പച്ചിക്ക് ദുല്‍ഖറിന്‍റെ ആശംസകള്‍
