മുംബൈ:ബോളിവുഡിലെ മൂന്ന് ഖാൻമാരെ ഇന്ത്യൻ പ്രേക്ഷകർ എന്നും സ്‌നേഹിക്കുന്നുണ്ടെന്ന് ബോളിവുഡ് താരം കങ്കണ റണാവത്. ഷാരൂഖ് ഖാന്‍റെ അടുത്തിടെ പുറത്തിറങ്ങിയ പഠാന്‍റെ വിജയം അതിന് തെളിവാണെന്നും കങ്കണ കൂട്ടിച്ചേർത്തു. പഠാന്‍റെ വിജയത്തെ അഭിനന്ദിച്ചുകൊണ്ട് സിനിമ നിർമാതാവ് പ്രിയ ഗുപ്‌തയുടെ ട്വീറ്റിനോട് പ്രതികരിച്ചുകൊണ്ടായിരുന്നു കങ്കണയുടെ പരാമർശം.
'പഠാൻ വിജയിച്ചതിന് ഷാരൂഖ് ഖാനും ദീപിക പദുകോണിനും അഭിനന്ദനങ്ങൾ. സിനിമയുടെ വിജയം തെളിയിക്കുന്നത്, 1) ഹിന്ദുക്കളും മുസ്‌ലിങ്ങളും ഷാരൂഖിനെ ഒരുപോലെ സ്നേഹിക്കുന്നു. 2) ബഹിഷ്‌കരണാഹ്വാനങ്ങൾ സിനിമയെ ദോഷകരമായി ബാധിച്ചിട്ടില്ല, മറിച്ച് സിനിമയുടെ വിജയത്തിന് ഗുണം ചെയ്‌തു. 3) മികച്ച ഇറോട്ടിക് രംഗങ്ങളും സംഗീതവും. 4) ഇന്ത്യയുടെ മതേതരത്വം' എന്നായിരുന്നു പ്രിയ ഗുപ്‌ത ട്വീറ്റ് ചെയ്‌തത്.
'വളരെ നല്ല വിശകലനം... ഈ രാജ്യം എല്ലാ ഖാൻമാരെയും സ്‌നേഹിച്ചിട്ടേയുള്ളു. ചില സമയങ്ങളിൽ ഖാൻമാരെ മാത്രം സ്നേഹിക്കുന്നു. കൂടാതെ, മുസ്‌ലിം നടിമാരോട് അഭിനിവേശമുണ്ട്. അതുകൊണ്ട് തന്നെ ഇന്ത്യയെ വെറുപ്പിന്‍റെയും ഫാസിസത്തിന്‍റെയും പേരിൽ ആക്ഷേപിക്കുന്നത് അന്യായമാണ്. ഈ ലോകത്ത് ഭാരതം പോലൊരു രാജ്യം എങ്ങുമുണ്ടാകില്ല' എന്നായിരുന്നു കങ്കണയുടെ മറുപടി.