'നിങ്ങൾ വിവേകമുള്ളവരാണെങ്കിൽ എന്നെ ഭയപ്പെടണം' ; ഹരിദ്വാറിലേയ്‌ക്കുള്ള യാത്രയിൽ മാധ്യമപ്രവർത്തകരോട് കങ്കണ

ഹരിദ്വാറിലേയ്‌ക്കുള്ള യാത്രയിൽ മുംബൈയിൽ വച്ച് തനിക്ക് ചുറ്റും കൂടിയ മാധ്യമപ്രവർത്തകരോട് പ്രതികരിച്ച് കങ്കണ റണാവത്ത്

മുംബൈ : വിവേകമുള്ള ആളാണെങ്കിൽ തന്നെ ഭയപ്പെടണമെന്ന് മാധ്യമപ്രവര്‍ത്തകനോട് രസകരമായ മറുപടിയുമായി ബോളിവുഡ് നടി കങ്കണ റണാവത്ത്.നടിയോട് സംസാരിക്കാൻ ഭയമാണെന്ന് പറഞ്ഞ ഒരു മാധ്യമപ്രവർത്തകനോടായിരുന്നു ചിരിച്ചുകൊണ്ടുള്ള നടിയുടെ പ്രതികരണം. ഹരിദ്വാറിലേയ്‌ക്കുള്ള യാത്രയ്‌ക്കിടെ മുംബൈ വിമാനത്താവളത്തില്‍വച്ചായിരുന്നു പരാമര്‍ശം.

വെള്ള സാരിയിൽ ചിക് ബിർകിൻ ബാഗും ധരിച്ച് മുംബൈയിലെ വിമാനത്താവളത്തിൽ മാധ്യമപ്രവർത്തകർക്ക് മുൻപിൽപ്പെട്ട താരം തന്‍റെ യാത്രയെ കുറിച്ചുള്ള വിവരങ്ങൾ ആദ്യം സ്വമേധയാ വെളിപ്പെടുത്തുകയായിരുന്നു. ഞാൻ ഹരിദ്വാറിലേക്ക് പോകുന്നുവെന്ന് മാധ്യപ്രവർത്തകർ ചോദിക്കുന്നതിന് മുൻപ് തന്നെ താരം പറഞ്ഞു.

'നിങ്ങൾ ചോദിച്ചില്ലെങ്കിലും, എനിക്ക് നിങ്ങളോട് പറയണമെന്ന് തോന്നി. എവിടേക്കാണ് ഞാൻ പോകുന്നതെന്ന്. ഞാൻ ഗംഗ ആരതിയ്ക്കായി പോവുകയാണ്. നാളെ ഞാൻ കേദാർനാഥിലേയ്‌ക്ക് പോകും' - താരം പറഞ്ഞു.

പ്രിയങ്ക ചോപ്ര ഹിന്ദി സിനിമ രംഗത്തെ ഗ്രൂപ്പിസത്തെക്കുറിച്ച് സംസാരിച്ചതിന് പിന്നാലെ വിവാദത്തെക്കുറിച്ച് ചോദ്യങ്ങൾ ഉന്നയിക്കാന്‍ മാധ്യമപ്രവർത്തകരോട് കങ്കണ റണാവത്ത് ആവശ്യപ്പെട്ടിരുന്നു. എന്നാൽ അഴിമതി വിഷയത്തിൽ മാധ്യമപ്രവർത്തകരുടെ ചോദ്യശരങ്ങൾ പ്രതീക്ഷിച്ച കങ്കണയോട് ചിത്രങ്ങൾക്ക് പോസ് ചെയ്യാന്‍ മാത്രമാണ് മാധ്യമപ്രവർത്തകർ ആവശ്യപ്പെട്ടത്.

'ഏതെങ്കിലും സംഭവത്തിൽ എന്‍റെ പേര് വന്നാൽ പിന്തുടരുന്നവരാണ് മാധ്യമങ്ങൾ. എന്നാൽ നിങ്ങൾ അങ്ങേയറ്റം ബുദ്ധിശാലികളാണ്. സിനിമ മാഫിയയാണ് വിഷയം എങ്കിൽ ആരും ചോദ്യങ്ങൾ ഉന്നയിക്കില്ല. എങ്ങനെയാണ് നിങ്ങൾക്ക് ചോദ്യങ്ങൾ ചോദിക്കാതിരിക്കാനാകുന്നത്' - താരം മാധ്യമപ്രവർത്തകരോട് ചോദിച്ചു.