കാളിദാസ് ജയറാം നായകനായി തിയേറ്ററുകളിൽ പ്രദർശനത്തിനെത്തിയ ചിത്രമാണ് രജനി (Kalidas Jayaram starrer Rajni Movie). ഡിസംബര്‍ 8ന് തിയേറ്ററുകളിലെത്തിയ ചിത്രം ഇപ്പോഴിതാ ഒടിടിയിൽ പ്രദർശനം ആരംഭിച്ചിരിക്കുകയാണ്. ആമസോൺ പ്രൈം വീഡിയോയിലൂടെയാണ് 'രജനി' പ്രേക്ഷകരുടെ സ്വീകരണ മുറികളിലേക്ക് എത്തിയത് (Rajni Movie started Streaming on Amazon Prime Video).
നവാഗതനായ വിനിൽ സ്‌കറിയയാണ് ഈ ഇൻവെസ്റ്റിഗേറ്റീവ് ക്രൈം ത്രില്ലറിന്‍റെ സംവിധായകൻ. നമിത പ്രമോദ് നായികയായ ചിത്രത്തിൽ റെബ മോണിക്ക ജോണ്‍, സൈജു കുറുപ്പ് എന്നിവരും പ്രധാന വേഷങ്ങളിലുണ്ട്. ലക്ഷ്‌മി ഗോപാലസ്വാമി, അശ്വിന്‍ കുമാര്‍, ശ്രീകാന്ത് മുരളി, വിന്‍സന്‍റ് വടക്കന്‍, രമേശ് ഖന്ന, പൂ രാമു, ഷോണ്‍ റോമി, കരുണാകരന്‍ എന്നിവരാണ് സിനിമയിലെ മറ്റ് കഥാപാത്രങ്ങളെ അവതരിപ്പിക്കുന്നത്.
മലയാളത്തിലും തമിഴിലും ദ്വിഭാഷ ചിത്രമായി ഒരുക്കിയ 'രജനി' നവരസ ഫിലിംസിന്‍റെ ബാനറില്‍ ശ്രീജിത്ത് കെ എസ്, ബ്ലെസി ശ്രീജിത്ത് എന്നിവരാണ് നിർമിച്ചത്. പരസ്യ കലാരംഗത്തെ പ്രഗല്‍ഭരായ നവരസ ഗ്രൂപ്പ് ആദ്യമായി നിർമിച്ച ചിത്രം കൂടിയാണിത്. സംവിധായകനായ വിനിൽ തന്നെയാണ് സിനിമയുടെ തിരക്കഥയും നിർവഹിച്ചിരിക്കുന്നത്.