Aquarium movie release: ദേശീയ പുരസ്‌കാര ജേതാവായ സംവിധായകന്‍ ടി.ദീപേഷിന്‍റെ അക്വേറിയത്തിന് പ്രദര്‍ശനാനുമതി. മതവികാരം വ്രണപ്പെടുത്തുന്നു എന്ന ആരോപണത്തില്‍ പ്രദര്‍ശനാനുമതി നിഷേധിച്ചിരുന്ന സിനിമയ്‌ക്ക്‌ ഹൈക്കോടതി വിധിയിലൂടെ പ്രദര്‍ശനാനുമതി ലഭിച്ചു. ഒടിടി പ്ലാറ്റ്‌ഫോമിലൂടെ ചിത്രം ഏപ്രില്‍ 13ന്‌ റിലീസ്‌ ചെയ്യും.
Director about Aquarium movie: ഒരു സ്‌ത്രീപക്ഷ സിനിമയായ അക്വേറിയത്തെ തടയാന്‍ പലപ്പോഴായി സങ്കുചിതമായി ചിന്തിക്കുന്നവര്‍ ശ്രമിച്ചു കൊണ്ടേയിരുന്നുവെന്ന്‌ സംവിധായകന്‍ ടീ ദീപേഷ്‌ പറയുന്നു. 2012 പൂര്‍ത്തിയായ ചിത്രത്തിന്‍റെ റിലീസ്‌ സെന്‍സര്‍ ബോര്‍ഡ്‌ തടഞ്ഞത്‌ മതവികാരം വ്രണപ്പെടുമെന്ന്‌ പറഞ്ഞായിരുന്നു. പല തവണ സിനിമക്കുള്ള അനുമതി തേടി സെന്‍സര്‍ ബോര്‍ഡ്‌ കേരള ഘടകത്തെയും കേന്ദ്ര ഘടകത്തെയും സമീപിച്ചിരുന്നെങ്കിലും പ്രദര്‍ശനാനുമതി നിഷേധിച്ചിരുന്നു.
ഒടുവില്‍ അണിയറ പ്രവര്‍ത്തകര്‍ സെന്‍സര്‍ ബോര്‍ഡ്‌ ട്രിബൂണലിനെ സമീപിക്കുകയായിരുന്നു. തുടര്‍ന്നാണ് റിലീസ്‌ അനുവദിച്ചത്‌. സെന്‍സര്‍ ബോര്‍ഡ്‌ ട്രിബൂണലിന്‍റെ നിര്‍ദേശ പ്രകാരം ചിത്രത്തിന്‍റെ പേരും മാറ്റിയിരുന്നു.