ഉരുള്‍പൊട്ടലിന്‍റെ ഭീകരത ദൃശ്യവത്‌കരിക്കുന്ന ഫഹദ് ഫാസില്‍ ചിത്രം മലയന്‍കുഞ്ഞിന്‍റെ മേക്കിങ് വീഡിയോ ശ്രദ്ധേയമാവുന്നു. കേരളത്തില്‍ നടന്ന സംഭവങ്ങളെ ഓര്‍മിപ്പിക്കുന്ന ചിത്രത്തിലെ ദൃശ്യങ്ങള്‍ സോഷ്യല്‍ മീഡിയയില്‍ വൈറലാവുകയാണ്. നാല്‍പത് അടി താഴ്‌ചയിലാണ് രണ്ടാം പകുതിയില്‍ സിനിമ നടക്കുന്നത് എന്ന് ഫഹദ് ഉള്‍പ്പെടെയുളള അണിയറക്കാര്‍ നേരത്തെ അറിയിച്ചിരുന്നു.
പ്രകൃതി ദുരന്തത്തിന്‍റെ പശ്ചാത്തലത്തില്‍ കഥ പറയുന്ന മലയന്‍കുഞ്ഞിലെ ചില ഭാഗങ്ങള്‍ കൂറ്റന്‍ സെറ്റുകളിട്ടാണ് ചിത്രീകരിച്ചിരിക്കുന്നത്. സെറ്റുകളൊരുക്കാന്‍ കഠിനാധ്വാനം ചെയ്യുന്ന സിനിമയിലെ അണിയറക്കാരെയാണ് പ്രധാനമായും വീഡിയോയില്‍ കാണിക്കുന്നത്. അതീജിവനം പ്രമേയമാക്കി ഒരുക്കിയ മലയന്‍കുഞ്ഞ് നവാഗതനായ സജിമോന്‍ ആണ് സംവിധാനം ചെയ്‌തിരിക്കുന്നത്.
30 വര്‍ഷത്തിന് ശേഷം സംഗീത മാന്ത്രികന്‍ ഏആര്‍ റഹ്മാന്‍ മലയാളത്തിലേക്ക് തിരിച്ചെത്തിയ ചിത്രം കൂടിയാണ് ഇത്. നേരത്തെ റഹ്മാന്‍റെ സംഗീതത്തില്‍ ഒരുങ്ങിയ പാട്ട് യൂടൂബില്‍ ഹിറ്റായിരുന്നു. രജിഷ വിജയനാണ് ചിത്രത്തിലെ നായിക. ഇന്ദ്രന്‍സ്, ജാഫര്‍ ഇടുക്കി ഉള്‍പ്പെടെയുളള താരങ്ങള്‍ മറ്റ് പ്രധാന റോളുകളില്‍ എത്തുന്നു.