ടൊവിനോ തോമസിനെ കേന്ദ്രകഥാപാത്രമാക്കി ഡോ.ബിജു സംവിധാനം ചെയ്യുന്ന ചിത്രമാണ് 'അദൃശ്യ ജാലകങ്ങള്‍'. ചിത്രത്തിലെ ടൊവിനോ തോമസിന്‍റെ സ്‌റ്റില്ലുകള്‍ സോഷ്യല്‍ മീഡിയയില്‍ വൈറലാവുകയാണ്. ആളെ തിരിച്ചറിയാനാവാത്ത വിധമുള്ള മേക്കോവറിലാണ് ടൊവിനോ പ്രത്യക്ഷപ്പെട്ടിരിക്കുന്നത്.
താരം തന്നെയാണ് തന്‍റെ പുതിയ മേക്കോവര്‍ സ്‌റ്റില്ലുകള്‍ സോഷ്യല്‍ മീഡിയയിലൂടെ പങ്കുവച്ചിരിക്കുന്നത്. 'എന്‍റെ ഏറ്റവും പ്രിയപ്പെട്ട കഥാപാത്രങ്ങളിലൊന്നിന്‍റെ ആദ്യ ഗ്ലിംസ്‌ ഇതാ. ഡോക്‌ടര്‍ ബിജുവിന്‍റെ, പേരില്ലാത്ത ഈ യുവാവിന് ജീവന്‍ നല്‍കുന്നതില്‍ അതിയായ സന്തോഷം. അദ്ദേഹത്തോടൊപ്പമുള്ള എന്‍റെ ആദ്യത്തെ സിനിമയാണിത്. നമുക്ക് ചുറ്റുമുള്ള ഒരുപാട് പേരില്ലാത്തവരെ പ്രതിനിധീകരിക്കുന്ന സര്‍റിയലിസത്തില്‍ വേരൂന്നിയ സിനിമ.
ഈ സിനിമയിലെ സാമൂഹിക പ്രസക്തമായ സന്ദേശം നിങ്ങളുടെ ഹൃദയത്തില്‍ തട്ടുകയും ചിന്തിപ്പിക്കുകയും ചെയ്യും. പരമ്പരാഗത ശൈലിയില്‍ നിന്ന് മാറി നില്‍ക്കുന്ന ഇത്രയും മൂല്യവത്തായ ചിത്രത്തിന് വേണ്ടി ഒന്നിച്ച അദൃശ്യ ജാലകങ്ങളുടെ മുഴുവന്‍ ക്രൂവിനെയും ഹൃദയത്തോട് ചേര്‍ക്കുന്നു.' -ടൊവിനോ കുറിച്ചു.
Also Read:'വലിയ സൂപ്പര്‍ സ്‌റ്റാര്‍ ആകേണ്ട.. അന്യ ഭാഷകളില്‍ സ്‌റ്റാര്‍ ആകാനും താല്‍പര്യമില്ല': ടൊവിനോ തോമസ്
പോസ്‌റ്റിന് താഴെ നിരവധി പേരാണ് താരത്തിന് ആശംസകള്‍ നേര്‍ന്ന് രംഗത്തെത്തിയിരിക്കുന്നത്. നിമിഷ സജയനാണ് ചിത്രത്തില്‍ നായികയായെത്തുന്നത്. 'ഒരു കുപ്രസിദ്ധ പയ്യന്' ശേഷം നിമിഷയും ടൊവിനോയും വീണ്ടും ഒന്നിച്ചെത്തുന്ന ചിത്രം കൂടിയാണ് 'അദൃശ്യ ജാലകങ്ങള്‍'. ഇന്ദ്രന്‍സും സുപ്രധാന വേഷത്തിലെത്തുന്നുണ്ട്. മൈത്രി മുവി മേക്കേഴ്‌സ്‌, ടൊവിനോ തോമസ് പ്രൊഡക്ഷന്‍സ്, എല്ലാനാര്‍ ഫിലിംസ് എന്നീ കമ്പനികളുടെ ബാനറിലാണ് സിനിമയുടെ നിര്‍മാണം.
