ദിലീപിന്‍റേതായി (Dileep) റിലീസിനൊരുങ്ങുന്ന 'ബാന്ദ്ര'യിലെ പുതിയ വീഡിയോ ഗാനം പുറത്ത് (Bandra New Song). ചിത്രത്തിലെ 'വാര്‍മേഘമേ' എന്ന ഗാനമാണ് അണിയറപ്രവര്‍ത്തകര്‍ പുറത്തുവിട്ടിരിക്കുന്നത് (Bandra song Vaarmeghame). തമന്നയും ദിലീപും തമ്മിലുള്ള പ്രണയ രംഗങ്ങളാണ് 4.24 മിനിറ്റ് ദൈര്‍ഘ്യമുള്ള ഗാന രംഗത്തില്‍.
നവംബര്‍ 10നാണ് ചിത്രം തിയേറ്ററുകളില്‍ എത്തുക (Bandra Release). അരുണ്‍ ഗോപിയാണ് സിനിമയുടെ സംവിധാനം. 'രാമലീല'യ്ക്ക് ശേഷം അരുണ്‍ ഗോപിയും ദിലീപും ഒന്നിക്കുന്ന ചിത്രം കൂടിയാണിത്. അഞ്ച് വര്‍ഷങ്ങള്‍ക്ക് ശേഷം ഈ കൂട്ടുകെട്ട് വീണ്ടും ഒന്നിക്കുമ്പോൾ ആരാധകരുടെ പ്രതീക്ഷകളും വാനോളമാണ്.
ഒരു സസ്‌പെന്‍സ്‌ ത്രില്ലര്‍ വിഭാഗത്തില്‍ ഒരുക്കിയിരിക്കുന്ന ചിത്രത്തില്‍ അലന്‍ അലക്‌സാണ്ടര്‍ ഡൊമിനിക് എന്ന കഥാപാത്രത്തെയാണ് ദിലീപ് അവതരിപ്പിക്കുന്നത്. ദിലീപിന്‍റെ കരിയറിലെ 147-ാമത് ചിത്രം കൂടിയാണ് 'ബാന്ദ്ര'. ദിലീപ് ചിത്രത്തിലൂടെ തെന്നിന്ത്യന്‍, ബോളിവുഡ് താരം തമന്ന ഭാട്ടിയ ഇതാദ്യമായാണ് മലയാളത്തില്‍ എത്തുന്നത്.
Also Read:Bandra Movie New Poster ദിലീപിനൊപ്പം തമന്ന; ബാന്ദ്രയുടെ പുതിയ പോസ്‌റ്ററുമായി താരം
തമന്നയെ കൂടാതെ തെന്നിന്ത്യന്‍ താരം ശരത് കുമാര്‍, ബോളിവുഡ് താരം ദിനോ മോറിയ എന്നിവരും ചിത്രത്തില്‍ സുപ്രധാന വേഷത്തില്‍ എത്തുന്നുണ്ട്. മംമ്‌ത മോഹന്‍ദാസ്, സിദ്ദിഖ്, ഗണേഷ് കുമാർ, കലാഭവൻ ഷാജോണ്‍ എന്നിവരും സിനിമയില്‍ അണിനിരക്കും.
നേരത്തെ 'ബാന്ദ്ര'യിലെ 'രക്ക രക്ക' എന്ന ഗാനവും പുറത്തിറങ്ങിയിരുന്നു. സിനിമയുടേതായി ഇതുവരെ പുറത്തിറങ്ങിയ പോസ്‌റ്ററുകളും ടീസറുകളുമെല്ലാം സോഷ്യല്‍ മീഡിയയുടെ ശ്രദ്ധ ആകര്‍ഷിച്ചിരുന്നു. 'ബാന്ദ്ര'യുടേതായി രണ്ട് ടീസറുകളാണ് ഇതുവരെ പുറത്തിറങ്ങിയത്.