'സൂഫിയും സുജാതയും' എന്ന ചിത്രത്തിലൂടെ പ്രേക്ഷക മനസിലേക്ക് ചേക്കേറിയ ദേവ് മോഹന്‍ നായകനായി പുതിയ ചിത്രം വരുന്നു. ജിജു അശോകന്‍ തിരക്കഥയെഴുതി സംവിധാനം ചെയ്യുന്ന 'പുള്ളി' എന്ന സിനിമയിലാണ് താരം പ്രധാന വേഷത്തിൽ എത്തുന്നത്. പുള്ളി സിനിമയുടെ ട്രെയിലർ പുറത്തുവന്നു (Dev Mohan starrer Pulli Official Trailer out).
ഉദ്വേഗം നിറഞ്ഞ രംഗങ്ങൾ കോർത്തിണക്കിയ ട്രെയിലറാണ് അണിയറ പ്രവർത്തകർ പുറത്തുവിട്ടിരിക്കുന്നത്. ജയിൽ പശ്‌ചാത്തലമാക്കി അണിയിച്ചൊരുക്കിയ ട്രെയിലർ മികച്ച പ്രതികരണം നേടുകയാണ്. അത്യുഗ്രൻ ആക്ഷൻ രംഗങ്ങളും ചിത്രത്തിലുടനീളം ഉണ്ടാകുമെന്ന ഉറപ്പും നൽകുന്നതാണ് ട്രെയിലർ.
'ഉറുമ്പുകള്‍ ഉറങ്ങാറില്ല' എന്ന ചിത്രത്തിന് ശേഷം ജിജു അശോകന്‍ സംവിധാനം ചെയ്യുന്ന ചിത്രമാണ് 'പുള്ളി'. മീനാക്ഷി ദിനേശ് ആണ് ഈ ചിത്രത്തിൽ മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. 'പൊറിഞ്ചു മറിയം' ജോസിൽ നൈല ഉഷ അവതരിപ്പിച്ച മറിയത്തിന്‍റെ കുട്ടിക്കാലം അവതരിപ്പിച്ച മീനാക്ഷി നസ്‌ലിൻ നായകനായ '18 പ്ലസി'ൽ നായികയായെത്തി കയ്യടി നേടിയിരുന്നു.
ഇന്ദ്രന്‍സും 'പുള്ളി'യിൽ നിർണായക വേഷത്തിലുണ്ട്. കലാഭവന്‍ ഷാജോണ്‍, ശ്രീജിത്ത് രവി, സെന്തിൽ കൃഷ്‌ണ, വിജയകുമാർ, സുധി കോപ്പ, ബാലാജി ശർമ്മ, വെട്ടുക്കിളി പ്രകാശ്, രാജേഷ് ശര്‍മ്മ, അബിന ബിനോ, ബിനോയ്, മുഹമ്മദ് ഇരവട്ടൂർ തുടങ്ങിയവരാണ് ചിത്രത്തിൽ മറ്റ് പ്രധാന കഥാപാത്രങ്ങൾക്ക് ജീവൻ പകരുന്നത്.