വമ്പൻ പ്രഖ്യാപനത്തിന്‍റെ വരവറിയിച്ച് 'ചന്ദ്രമുഖി 2' നിർമാതാക്കൾ. ചിത്രത്തിന്‍റെ പുതിയ അപ്‌ഡേറ്റ് ഇന്ന് (ജൂൺ 29) എത്തുമെന്ന് അറിയിച്ചിരിക്കുകയാണ് ചിത്രത്തിന്‍റെ നിർമാതാക്കളായ ലൈക്ക പ്രൊഡക്ഷൻസ്. ഇന്ന് വൈകിട്ട് അഞ്ച് മണിക്ക് 'ചന്ദ്രമുഖി 2' സിനിമയുടെ പുതിയ വിശേഷം പ്രേക്ഷകർക്കരികിൽ എത്തുമെന്നാണ് അറിയിപ്പ്.
തമിഴ് ചിത്രം ചന്ദ്രമുഖിയുടെ രണ്ടാംഭാഗമാണ് 'ചന്ദ്രമുഖി 2'. തമിഴ്‌നാട്ടിൽ വൻ ഹിറ്റായിരുന്ന 'ചന്ദ്രമുഖി'യുടെ രണ്ടാം ഭാഗത്തിൽ ബോളിവുഡ് താരം കങ്കണ റണാവത്തും രാഘവ ലോറൻസുമാണ് പ്രധാന വേഷത്തിലെത്തുന്നത്. ലൈക്ക പ്രൊഡക്ഷൻസിന്‍റെ ബാനറിൽ പി വാസുവാണ് ചിത്രം സംവിധാനം ചെയ്യുന്നത്. അടുത്തിടെയാണ് സിനിമയുടെ ചിത്രീകരണം പൂർത്തിയായത്. 'ചന്ദ്രമുഖി 2'വിന്‍റെ റിലീസ് തിയതിയാകും നിർമാതാക്കൾ പുറത്തുവിടുകയെന്നാണ് ആരാധകർ പറയുന്നത്.
മലയാളത്തിലെ എക്കാലത്തെയും സൂപ്പർഹിറ്റ് ചിത്രങ്ങളിൽ ഒന്നായ ‘മണിച്ചിത്രത്താഴി’ന്‍റെ തമിഴ് റിമേക്ക്‌ ആയിരുന്നു 'ചന്ദ്രമുഖി'. പ്രധാനപ്പെട്ട ഇന്ത്യന്‍ ഭാഷകളിലേക്കല്ലാം റീമേക്ക് ചെയ്യപ്പെട്ട ചിത്രമായിരുന്നു 1993ല്‍ ഫാസിലിന്‍റെ സംവിധാനത്തില്‍ എത്തിയ 'മണിച്ചിത്രത്താഴ്'. ഈ ചിത്രത്തിന്‍റെ കന്നഡ റീമേക്ക് 'ആപ്‌തമിത്ര'യുടെ ഒഫിഷ്യല്‍ റീമേക്ക് ആയി പുറത്തുവന്ന ചിത്രമായിരുന്നു 'ചന്ദ്രമുഖി'.
'ആപ്‌തമിത്ര' സംവിധാനം ചെയ്‌ത പി വാസു തന്നെയായിരുന്നു തമിഴിലും ചിത്രം ഒരുക്കിയത്. രജനീകാന്ത് നായകനായി 2005-ൽ പുറത്തിറങ്ങിയ ചന്ദ്രമുഖിയിൽ പ്രഭു, ജ്യോതിക, നയൻതാര, വിനീത് തുടങ്ങിയവരും വേഷമിട്ടിരുന്നു. അതേസമയം വടിവേലു, രാധിക ശരത്കുമാർ, ലക്ഷ്‌മി മേനോൻ എന്നിവരാണ് രണ്ടാം ഭാഗത്തിൽ കങ്കണ റണാവത്തിനും രാഘവ ലോറൻസിനും ഒപ്പം അണിനിരക്കുന്നത്.
READ ALSO:ഭയപ്പെടുത്താൻ 'ചന്ദ്രമുഖി' മടങ്ങി വരുന്നു... രാഘവ ലോറൻസും കങ്കണയും പ്രധാന വേഷത്തിൽ