എയര്‍പോര്‍ട്ടില്‍ തടഞ്ഞത് ഷാരൂഖിന്‍റെ അംഗരക്ഷകനെ, വിശദീകരണവുമായി കസ്റ്റംസ്

ഷാര്‍ജ പുസ്‌തകോത്സവത്തില്‍ പങ്കെടുത്ത് ദുബായില്‍ നിന്നും വെളളിയാഴ്‌ച രാത്രിയാണ് ഷാരൂഖ് മുംബൈയില്‍ എത്തിയത്. തുടര്‍ന്ന് എയര്‍പോര്‍ട്ടില്‍ നടനെ കസ്റ്റംസ് തടഞ്ഞെന്നായിരുന്നു റിപ്പോര്‍ട്ടുകള്‍

മുംബൈ:ബോളിവുഡ് സൂപ്പര്‍താരം ഷാരൂഖ് ഖാനെ മുംബൈ വിമാനത്താവളത്തില്‍ തടഞ്ഞെന്ന വാര്‍ത്തകള്‍ നിഷേധിച്ച് കസ്റ്റംസ്. എസ്ആര്‍കെയുടെ അംഗരക്ഷകനായ രവി സിംഗിനെയാണ് കസ്റ്റംസ് നിയമങ്ങള്‍ ലംഘിച്ചതിന് എയര്‍ ഇന്‍റലിജന്‍സ് യൂണിറ്റ് തടഞ്ഞത്. ഷാര്‍ജ പുസ്‌തകോത്സവത്തില്‍ പങ്കെടുത്ത് ദുബായില്‍ നിന്നും വെളളിയാഴ്‌ച രാത്രിയാണ് തന്‍റെ ടീമിനൊപ്പം ഷാരൂഖ് മുംബൈയില്‍ എത്തിയത്.

ഷാരൂഖിന് പിന്നാലെ ബോഡിഗാർഡ് രവി സിംഗ് ലഗേജുമായി വീട്ടിലേക്ക് വരികയായിരുന്നു. തുടര്‍ന്ന് എട്ടാം നമ്പർ ഗേറ്റിൽ പരിശോധനയ്ക്കായി താരത്തിന്‍റെ അംഗരക്ഷകനെ കസ്‌റ്റംസ് തടഞ്ഞു. ബാഗേജ് ചെക്കിങ് പോയിന്‍റിൽ വച്ച് രവി സിംഗിന്‍റെ പക്കൽ രണ്ട് ആഡംബര വാച്ചുകളും നാല് ഒഴിഞ്ഞ വാച്ച് ബോക്‌സുകളും ഉണ്ടായിരുന്നു. ഇതുകൂടാതെ ലഗേജിൽ ഐവാച്ച് സീരീസ് 8 ന്‍റെ ഒരു ഒഴിഞ്ഞ ബോക്‌സും ഉണ്ടായിരുന്നു.

എയര്‍ ഇന്‍റലിജന്‍സ് യൂണിറ്റ് എല്ലാ പെട്ടികൾക്കും ഡ്യൂട്ടി അടച്ചു, ഷാരൂഖ് ഖാനോട് ഡ്യൂട്ടി മാത്രം അടയ്ക്കാൻ ആവശ്യപ്പെട്ടപ്പോള്‍ അദ്ദേഹം സമ്മതിക്കുകയും മുഴുവൻ ഡ്യൂട്ടി നൽകുകയും ചെയ്‌തുവെന്ന് കസ്‌റ്റംസ് പറഞ്ഞു. കസ്റ്റംസ് ഡ്യൂട്ടിയായി 6.83 ലക്ഷം രൂപ ഷാരൂഖിന് അടക്കേണ്ടി വന്നു. കസ്റ്റംസ് തീരുവ അടച്ച ശേഷം എല്ലാവരെയും പോകാൻ അനുവദിച്ചതായും മുംബൈ കസ്റ്റംസ് അറിയിച്ചു.

നേരത്തെ, ഷാരൂഖ് ഖാനെ മുംബൈ വിമാനത്താവളത്തിൽ തടഞ്ഞുനിർത്തി കസ്റ്റംസ് ചോദ്യം ചെയ്‌തതായി റിപ്പോർട്ടുകൾ ഉണ്ടായിരുന്നു. എന്നാൽ ബോളിവുഡ് നടനെ കസ്റ്റഡിയിലെടുത്തിട്ടില്ലെന്നും ചോദ്യങ്ങളൊന്നും ചോദിച്ചില്ലെന്നും കസ്റ്റംസ് പറഞ്ഞു.