കാണികളെ ഭയത്തിന്റെ മുൾമുനയിൽ നിർത്തിയ 'ഡിമോന്റെ കോളനി' സിനിമയുടെ രണ്ടാം ഭാഗം വരുന്നു. പ്രേക്ഷക നിരൂപക പ്രശംസ ഒരുപോലെ ഏറ്റുവാങ്ങിയ ചിത്രത്തിന്റെ സീക്വൽ 'ഡിമോന്റെ കോളനി 2'വിന്റെ ട്രെയിലർ പുറത്തുവന്നു. ആദ്യ ഭാഗം ഒരുക്കിയ അജയ് ജ്ഞാനമുത്തു തന്നെയാണ് പുതിയ ചിത്രവും സംവിധാനം ചെയ്യുന്നത്.
തിങ്ക് മ്യൂസിക് ഇന്ത്യയുടെ യൂട്യൂബ് ചാനലിലൂടെ പുറത്തുവന്ന ട്രെയിലർ മികച്ച പ്രതികരണമാണ് നേടുന്നത്. ഇതുവരെ 22 ലക്ഷത്തോളം കാഴ്ചക്കാരെ ട്രെയിലർ സ്വന്തമാക്കി കഴിഞ്ഞു. ഹൊറർ രംഗങ്ങളാൽ സമ്പന്നമായിരിക്കും ചിത്രമെന്ന സൂചനയും തരുന്നതാണ് ട്രെയിലർ.
അരുൾനിധിയാണ് 'ഡിമോന്റെ കോളനി 2'വിലെയും നായകൻ. പ്രിയ ഭവാനി ശങ്കർ നായികയായും എത്തുന്നു. അരുൺ പാണ്ഡ്യൻ, മലയാളി താരം സർജാനോ ഖാലിദ് എന്നിവരാണ് ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
അരുൾനിധിക്കൊപ്പം രമേഷ് തിലക്, സനന്ത്, അഭിഷേക് ജോസഫ് ജോർജ് എന്നിവരാണ് ആദ്യ ഭാഗമായ 'ഡിമോന്റെ കോളനി'യിൽ വേഷമിട്ടത്. ആൽവാർപേട്ടിലെ 'ഡിമോന്റെ കോളനി'യിൽ നടക്കുന്ന ഒരു സാങ്കൽപ്പിക കഥയാണ് ചിത്രം പറഞ്ഞത്. മദ്യപിച്ച ഏതാനും സുഹൃത്തുക്കൾ ഈ കോളനിയിലെ ഒരു ആൾപ്പാർപ്പില്ലാത്ത ബംഗ്ലാവിൽ എത്തുന്നതും തുടർന്ന് അവിടെ അവർ നേരിടുന്ന അവിശ്വസനീയമായ അനുഭവങ്ങളുമായിരുന്നു ചിത്രത്തിന്റെ പ്രമേയം.