ഹെൽമെറ്റില്ലാതെ ബൈക്ക് യാത്ര; അമിതാഭ് ബച്ചനും അനുഷ്‌ക ശർമയ്ക്കും പിഴ

മുംബൈയിലെ തിരക്കേറിയ റോഡിലൂടെയായിരുന്നു അമിതാഭ് ബച്ചനും അനുഷ്‌ക ശർമയും ഹെൽമെറ്റ് ധരിക്കാതെ യാത്ര ചെയ്‌തത്. ഇവരുടെ ചിത്രങ്ങൾ സോഷ്യൽ മീഡിയയിൽ വൈറലായിരുന്നു

മുംബൈ:ഹെൽമെറ്റ് ധരിക്കാതെ ബൈക്കിൽ യാത്ര ചെയ്‌തതിന് ബോളിവുഡ് താരങ്ങളായ അനുഷ്‌ക ശർമയ്‌ക്കും അമിതാഭ് ബച്ചനും പിടിവീണു. ഷൂട്ടിങ് സെറ്റിൽ വേഗത്തിൽ എത്താനായി മുംബൈയിലെ തിരക്കേറിയ റോഡിലൂടെ ബൈക്കിൽ യാത്ര ചെയ്‌ത താരങ്ങൾക്കെതിരെ മുംബൈ പൊലീസ് പിഴ ചുമത്തിയതായി ദേശീയ മാധ്യമങ്ങൾ റിപ്പോർട്ട് ചെയ്‌തു. അനുഷ്‌ക ശര്‍മയുടെ ബോഡിഗാര്‍ഡിനും ബിഗ് ബിക്ക് ലിഫ്‌റ്റ് നൽകിയ ആൾക്കും പിഴയിട്ടതായാണ് റിപ്പോർട്ട്.

മുംബൈയിലൂടെ ബൈക്കിന് പിന്നിലിരുന്നുള്ള അനുഷ്‌ക ശര്‍മയുടെ യാത്ര കഴിഞ്ഞ ദിവസം വാര്‍ത്തകളില്‍ നിറഞ്ഞിരുന്നു. പിന്നാലെ ഹെൽമെറ്റ് ധരിക്കാതെ, നിയമ ലംഘനം നടത്തിയതിന് അനുഷ്‌കയുടെ ബോഡിഗാര്‍ഡിന് പൊലീസ് പിഴ ചുമത്തുകയായിരുന്നു. ഹെൽമെറ്റ് ധരിക്കാത്തതിന്‍റെ പേരില്‍ ബോഡിഗാര്‍ഡിന് മുംബൈ ട്രാഫിക് പൊലീസ് 10,500 രൂപ പിഴയിട്ടതായി ദേശീയ മാധ്യമങ്ങൾ റിപ്പോർട്ട് ചെയ്‌തു.

ചലാൻ സെക്ഷൻ 129/194(ഡി), സെക്ഷൻ 5/180 & സെക്ഷൻ 3(1)181 എംവി ആക്‌ട് എന്നിവ പ്രകാരമാണ് നടപടി. പിഴ തുക അടച്ചതായും റിപ്പോര്‍ട്ട് വ്യക്തമാക്കുന്നു. അനുഷ്‌ക ശര്‍മയെ കൂടാതെ അമിതാഭ് ബച്ചൻ ഹെൽമെറ്റ് ധരിക്കാതെ നടത്തിയ ബൈക്ക് യാത്രയും ഏറെ വിവാദമായിരുന്നു.

എന്നാല്‍ താന്‍ നിയമം ലംഘിച്ചില്ല എന്നായിരുന്നു ബച്ചൻ്റെ വാദം. ഷൂട്ടിങ്ങിന്‍റെ ഭാഗമായിരുന്നു യാത്രയെന്നും ഇതിനായി നേരത്തെ അനുവാദം വാങ്ങിയിരുന്നു എന്നും താരം വ്യക്തമാക്കിയിരുന്നു. എന്നാൽ താരങ്ങളുടെ നിയമ ലംഘനം സോഷ്യൽ മീഡിയയിൽ ഉൾപ്പടെ ചൂടേറിയ ചർച്ചകൾക്ക് വഴിവച്ചതോടെയാണ് അധികൃതർ നടപടിയുമായി രംഗത്തെത്തിയത്.

ബൈക്ക് യാത്രക്കാർക്കെതിരെ പുറപ്പെടുവിച്ച പിഴ അടങ്ങിയ ചലാനുകളുടെ പകർപ്പുകൾ മുംബൈ ട്രാഫിക് പൊലീസ് ട്വിറ്ററിൽ പങ്കുവച്ചിട്ടുണ്ട്. 1,000 രൂപ പിഴയ്‌ക്കൊപ്പം എംവി ആക്‌ടിലെ സെക്ഷൻ 129/194 (ഡി) പ്രകാരമാണ് ബച്ചന് ലിഫ്‌റ്റ് നൽകിയ ആൾക്കെതിരെ ചലാൻ പുറപ്പെടുവിച്ചത്.

ഈ കഴിഞ്ഞ ഞായറാഴ്‌ചയായിരുന്നു ബിഗ്‌ ബിയുടെ ബൈക്ക് യാത്ര. താരം തന്നെയാണ് ബൈക്ക് സവാരിയുടെ ചിത്രങ്ങൾ ആരാധകരുമായി പങ്കുവച്ചത്. എപ്പോഴുമെന്ന പോലെ രസകരമായ ക്യാപ്‌ഷനും താരം ചിത്രങ്ങൾക്ക് നൽകിയിരുന്നു.

'സവാരിക്ക് നന്ദി സുഹൃത്തേ, നിങ്ങളെ അറിയില്ല. എന്നാൽ നിങ്ങൾ എന്നെ ജോലിസ്ഥലത്ത് കൃത്യസമയത്ത് എത്തിച്ചു. ഷോർട്ട്സും മഞ്ഞ ടി-ഷർട്ടും ധരിച്ചെത്തിയ വ്യക്തിക്ക് നന്ദി' -എന്നായിരുന്നു താരം കുറിച്ചത്. ബൈക്കിന്‍റെ പിൻസീറ്റിൽ സ്‌പോർട്ടി വസ്ത്രം ധരിച്ച് ഇരിക്കുന്ന ബിഗ് ബിയുടെ ചിത്രങ്ങൾ അതിവേഗത്തിലാണ് വൈറലായത്. നീല പാന്‍റും കറുത്ത ടീ ഷർട്ടും തവിട്ടുനിറത്തിലുള്ള ജാക്കറ്റും ധരിച്ച് സ്റ്റൈലിഷ് ലുക്കിലായിരുന്നു താരം.

അതേസമയം തിങ്കളാഴ്‌ച ആയിരുന്നു അനുഷ്‌ക തൻ്റെ ബോർഡിഗാഡിനൊപ്പം ബൈക്കിൽ പ്രത്യക്ഷപ്പെട്ടത്. ഗതാഗത തടസം ഉണ്ടായതോടെ താരം ബൈക്കില്‍ യാത്ര ചെയ്യാന്‍ തീരുമാനിക്കുകയായിരുന്നു.