ന്യൂഡൽഹി : സംവിധായകൻ ആർ ബാൽകിയുടെ സൈക്കോളജിക്കൽ ത്രില്ലറായ 'ചുപ് ' എന്ന ചിത്രത്തില്‍ അമിതാഭ് ബച്ചൻ ചിട്ടപ്പെടുത്തിയ ട്യൂണും. അതേക്കുറിച്ച് സംവിധായകന്‍ പറയുന്നതിങ്ങനെ. 'ചിത്രം കാണാൻ അദ്ദേഹത്തോട് ഞാന്‍ ആവശ്യപ്പെട്ടിരുന്നു. കഥാപാത്രങ്ങൾ അദ്ദേഹത്തെ വളരെയേറെ സ്‌പർശിച്ചതായും അതിൽ ഒരുപാട് സന്തോഷമുണ്ടെന്നും അദ്ദേഹം അറിയിച്ചു. ഒപ്പം പിയാനോയിൽ ഒരു ട്യൂൺ വായിച്ച് കേൾപ്പിച്ചു'.
ഈ ട്യൂണാണ് ചിത്രത്തില്‍ ഉപയോഗിച്ചിരിക്കുന്നത്. അദ്ദേഹം കേൾപ്പിച്ച ട്യൂൺ സിനിമയ്ക്കായി ആവശ്യപ്പെട്ടപ്പോൾ പൂർണ സമ്മതത്തോടെ നല്‍കുകയായിരുന്നുവെന്നും തീര്‍ത്തും യാദൃശ്ചികമായിരുന്നു അതെന്നും ബാല്‍കി പറഞ്ഞു. അമിതാഭ് ബച്ചൻ ഔദ്യോഗികമായി സംഗീതസംവിധാനം നിർവഹിക്കുന്ന ആദ്യത്തെ ചിത്രമാണ് 'ചുപ് '. 'പാ', 'ചീനി കം', 'ഷമിതാഭ്' തുടങ്ങിയ നിരവധി ചിത്രങ്ങളിൽ അമിതാഭ് ബച്ചനും ആർ ബാൽകിയും ഒന്നിച്ച് പ്രവർത്തിച്ചിട്ടുണ്ട്.