ന്യൂഡല്‍ഹി: താരങ്ങളോടുള്ള അമിത ആരാധനയെതുടര്‍ന്ന് സുരക്ഷ ജീവനക്കാരെ മറികടന്ന് അവരെ ആലിംഗനം ചെയ്യുവാനും സെല്‍ഫിയെടുക്കാനും എത്തുന്നവരെ നാം കണ്ടിട്ടുണ്ട്. ഇത്തരം അവസരങ്ങളില്‍ താരങ്ങളുടെ പ്രതികരണം പല തരത്തില്‍ ചർച്ചയാകാറുമുണ്ട്. എന്നാല്‍, ബോളിവുഡ് സൂപ്പര്‍താരം അക്ഷയ്‌ കുമാറിന്‍റെ ആരാധകനോടുള്ള സമീപനത്തില്‍ ആരാധകരും സമൂഹമാധ്യമങ്ങളും കയ്യടിച്ചിരിക്കുകയാണ്.
നെഞ്ചോട് ചേര്‍ത്ത് താരം:തന്‍റെ ഏറ്റവും പുതിയ ചിത്രമായ 'സെല്‍ഫി'യുടെ പ്രൊമോഷന്‍ പരിപാടിയ്‌ക്കായി ഡല്‍ഹിയില്‍ എത്തിയതായിരുന്നു അക്ഷയ്‌ കുമാര്‍. ഈ അവസരത്തില്‍ ജനക്കൂട്ടത്തെ മറികടന്ന് അക്ഷയ്‌ കുമാറിന്‍റെ കാലില്‍ തൊടുവാന്‍ ബാരിക്കേഡുകള്‍ തകര്‍ത്തു വന്ന ആരാധകനെ താരത്തിന്‍റെ ബോഡിഗാര്‍ഡ് തള്ളിമാറ്റിയിരുന്നു. ഈ അവസരത്തില്‍ സമയം ഒട്ടും പാഴാക്കാതെ തന്നെ താരം, സുരക്ഷ ജീവനക്കാരനെ തടയുകയും ആരാധകനെ കൈപിടിച്ച് എഴുന്നേല്‍പ്പിക്കുകയും കെട്ടിപിടിക്കുകയും ചെയ്‌തു.
സമൂഹമാധ്യമങ്ങള്‍ പ്രചരിക്കുന്ന അക്ഷയ്‌ കുമാറിന്‍റെ വീഡിയോ കണ്ടവര്‍ ഒന്നടങ്കം നടന്‍ വലിയ മനസിന് ഉടമയാണ് എന്ന കമന്‍റുമായെത്തി. 'അത് കലക്കി സര്‍' എന്ന ക്യാപ്‌ഷനോടെ ട്വിറ്റര്‍ ഉപയോക്താവായ താര ശര്‍മ, അക്ഷയ്‌ കുമാറിന്‍റെ വീഡിയോ പങ്കുവെച്ചു. കറുപ്പ് നിറമുള്ള ടി-ഷര്‍ട്ടും പാന്‍റും ധരിച്ച് മൊണോട്ടോണ്‍ ലുക്കിലായിരുന്നു താരം പ്രൊമോഷന്‍ പരിപാടിയ്‌ക്കായി എത്തിയത്.
നന്ദിയറിയിച്ച് അക്ഷയ്‌: ഈ മാസം 24ന് തിയേറ്ററില്‍ എത്തുന്ന സെല്‍ഫി എന്ന ചിത്രത്തിന്‍റെ പ്രൊമോഷന്‍ തിരക്കിലാണ് അക്ഷയ്‌ കുമാര്‍. ഡല്‍ഹിയില്‍ ഇമ്രാന്‍ ഹാഷ്‌മിയോടൊപ്പം നടത്തിയ സിനിമയുടെ പ്രൊമോഷന്‍ പരിപാടിയും സമൂഹമാധ്യമങ്ങളില്‍ തരംഗമായിരിക്കുകയാണ്. പരിപാടികള്‍ക്ക് ശേഷം, ആരാധകര്‍ക്ക് 'ഹൃദയത്തില്‍ നിന്നും സ്‌നേഹമറിയിക്കുന്നു' എന്ന തലക്കെട്ടോടെ താരം ട്വീറ്റ് ചെയ്‌തിരുന്നു.