അക്ഷയ് കുമാര്‍ ചിത്രം 'സെല്‍ഫി'യുടെ റിലീസ് തീയതി പുറത്ത്. രാജ് മെഹ്ത സംവിധാനം ചെയ്യുന്ന സിനിമ ഫെബ്രുവരി 24ന് തിയേറ്ററുകളിലെത്തും. അക്ഷയ് കുമാര്‍ ആണ് ഇക്കാര്യം ആരാധകരെ അറിയിച്ചിരിക്കുന്നത്.
സെല്‍ഫിയുടെ മോഷന്‍ പോസ്‌റ്റര്‍ നടന്‍ പുറത്തുവിട്ടു. അക്ഷയ് കുമാറും ഇമ്രാന്‍ ഹാഷ്‌മിയുമാണ് മോഷന്‍ പോസ്‌റ്ററില്‍. 'ആരാധകര്‍ താരത്തെ ഉണ്ടാക്കുന്നു. അവര്‍ വിചാരിച്ചാലും ഒരു താരത്തെ തകര്‍ക്കാന്‍ കഴിയും! ആരാധകര്‍ തന്‍റെ ആരാധനാ മൂര്‍ത്തിക്കെതിരെ തിരിയുമ്പോള്‍ എന്താണ് സംഭവിക്കുന്നതെന്ന് നോക്കുക. ഫെബ്രുവരി 24ന് സെല്‍ഫി തിയേറ്ററുകളില്‍.' -അക്ഷയ് കുമാര്‍ കുറിച്ചു.
'ഒരു സൂപ്പര്‍സ്‌റ്റാര്‍, ഒരു സൂപ്പര്‍ ഫാന്‍' എന്ന അടിക്കുറിപ്പോടുകൂടിയാണ് ഇമ്രാന്‍ ഹാഷ്‌മി റിലീസ് തീയതി അടങ്ങുന്ന മോഷന്‍ പോസ്‌റ്റര്‍ സോഷ്യല്‍ മീഡിയയില്‍ പങ്കുവച്ചിരിക്കുന്നത്. സൂപ്പര്‍ സ്‌റ്റാറിന്‍റെയും സൂപ്പര്‍ ആരാധകന്‍റെയും കഥയാണ് സെല്‍ഫി എന്നാണ് കരണ്‍ ജോഹര്‍ സോഷ്യല്‍ മീഡിയയില്‍ കുറിച്ചത്.