Aishwarya Rajesh Tamil Hindi bilingual film: പുതിയ സിനിമയുടെ തിരക്കിലാണിപ്പോള്‍ തെന്നിന്ത്യന്‍ താരസുന്ദരി ഐശ്വര്യ രാജേഷ്. തന്‍റെ പുതിയ സിനിമയുടെ പ്രഖ്യാപനവുമായി താരം തന്നെ രംഗത്തെത്തിയിരിക്കുകയാണ്. തമിഴിലും ഹിന്ദിയിലും ഒരേസമയം ഒരുങ്ങുന്ന ചിത്രത്തിന് 'മാണിക്ക്' എന്നാണ് പേരിട്ടിരിക്കുന്നത്. 'ലുഡോ', 'ജഗ്ഗ ജാസൂസ്', 'ഛത്രസല്‍' തുടങ്ങിയ സിനിമകളുടെ തിരക്കഥാകൃത്ത് സമ്രത്ത് ചക്രബര്‍ത്തിയാണ് 'മാണിക്കി'ന്‍റെ സംവിധാനം.
Aishwarya Rajesh about Manik: 'മാണിക്ക്' സെറ്റിലെ ഒരു ചിത്രം പങ്കുവച്ച് കൊണ്ടായിരുന്നു ഐശ്വര്യ തന്‍റെ പുതിയ സിനിമയുടെ പ്രഖ്യാപനം നടത്തിയിരിക്കുന്നത്. 'മാണിക്കിന്‍റെ ഭാഗമാകാൻ കഴിഞ്ഞതിൽ അതിയായ സന്തോഷവും ആദരവും. ഇതിനായി കാത്തിരിക്കുന്നു. നവംബര്‍ രണ്ടിന്‌ സിനിമയുടെ ചിത്രീകരണം ആരംഭിച്ചു. സമ്രത്ത് ചക്രബര്‍ത്തി സാറാണ് സംവിധാനം', ഇപ്രകാരമാണ് ചിത്രം പങ്കുവച്ച് ഐശ്വര്യ ട്വീറ്റ്‌ ചെയ്‌തത്.
Psychological thriller titled Manik: ഒരു സൈക്കോളജിക്കല്‍ ത്രില്ലറായാണ് ചിത്രം ഒരുങ്ങുന്നത്. അതേസമയം സിനിമയുടെ പ്രമേയം സംബന്ധിച്ച് കൂടുതല്‍ വിവരങ്ങള്‍ ലഭ്യമല്ല. സംയുക്ത ഷണ്‍മുഖനാഥന്‍, വിവേക് പ്രസന്ന, സ്വാര്‍ കാംബ്ലെ, സായ്‌ ജനനി തുടങ്ങിയവര്‍ ചിത്രത്തില്‍ സുപ്രധാന വേഷത്തിലെത്തുന്നുണ്ട്‌. എന്‍ഡെമോള്‍ ഷൈന്‍ ഇന്ത്യയാണ് സിനിമയുടെ നിര്‍മാണം. നൈനിത്താലില്‍ സിനിമയുടെ ചിത്രീകരണം ആരംഭിച്ചിട്ടുണ്ട്. 2023ലാണ് ചിത്രം തിയേറ്ററുകളിലെത്തുക.
Aishwarya Rajesh Bollywood movies: ഐശ്വര്യയുടെ രണ്ടാമത്തെ ബോളിവുഡ് ചിത്രം കൂടിയാണ് 'മാണിക്ക്'. 2017ല്‍ പുറത്തിറങ്ങിയ 'ഡാഡി'യിലൂടെയാണ് ഐശ്വര്യ ബോളിവുഡില്‍ അരങ്ങേറ്റം കുറിക്കുന്നത്. 'ഡ്രൈവര്‍ ജമുന' ആണ് ഐശ്വര്യയുടേതായി റിലീസിനൊരുങ്ങുന്ന പുതിയ ചിത്രങ്ങളില്‍ ഒന്ന്. മലയാളം, തമിഴ്‌, തെലുഗു, കന്നഡ എന്നീ ഭാഷകളില്‍ ഇന്നാണ് ചിത്രം തിയേറ്ററുകളിലെത്തിയത്. 2020ല്‍ പുറത്തിറങ്ങിയ 'വാനം കൊട്ടട്ടും' എന്ന സിനിമയ്‌ക്ക് ശേഷമുള്ള നടിയുടെ ആദ്യ ബിഗ്‌ സ്‌ക്രീന്‍ റിലീസ് കൂടിയാണ് 'ഡ്രൈവര്‍ ജമുന'.