മുംബൈ: ബോളിവുഡ് സംവിധായകൻ രോഹിത് ഷെട്ടിയുടെ എറ്റവും പുതിയ സീരിസ് പരമ്പരയായ 'ഇന്ത്യ പൊലീസ് ഫോഴ്‌സിൽ' ജോയിൻ ചെയ്‌ത് സൂപ്പർ താരം വിവേക് ഒബ്റോയ്. രോഹിത് ഷെട്ടി തന്നെയാണ് ഇക്കാര്യം ഇൻസ്റ്റഗ്രാമിലൂടെ അറിയിച്ചത്. നേരത്തെ സിദ്ധാർഥ് മൽഹോത്രയും, ശിൽപ്പ ഷെട്ടിയും സീരിസിൽ ജോയിൻ ചെയ്‌തിരുന്നു. ആമസോണ്‍ പ്രൈമാണ് സീരിസിന്‍റെ വിതരണാവകാശം ഏറ്റെടുത്തിരിക്കുന്നത്.
'ഞങ്ങളുടെ സ്ക്വാഡിലെ ഏറ്റവും പരിചയ സമ്പന്നനായ മുതിർന്ന ഉദ്യോഗസ്ഥനെ പരിചയപ്പെടുത്തുന്നു. സ്വാഗതം വിവേക്.' സീരിസിലെ താരത്തിന്‍റെ ഫസ്റ്റ് ലുക്ക് ചിത്രത്തോടൊപ്പം രോഹിത് ഷെട്ടി കുറിച്ചു. പൊലീസ് യൂണിഫോമും ബുള്ളറ്റ് പ്രൂഫ് ജാക്കറ്റും, കൂളിങ് ഗ്ലാസും ധരിച്ച് തോക്കുമേന്തി നിൽക്കുന്ന വിവേക് ഒബ്‌റോയിയുടെ ചിത്രമാണ് രോഹിത് പുറത്ത് വിട്ടത്.