ജൂലൈ 21 നാണ് മാർഗോട്ട് റോബിയും (Margot Robbie) റയാൻ ഗോസ്ലിംഗും (Ryan Gosling) അണിനിരന്ന 'ബാർബി'യും (Barbie) സിലിയൻ മർഫിയുടെ (Cillian Murphy) 'ഓപ്പൺഹൈമറും' (Oppenheimer) ബോക്‌സോഫിസിൽ ഏറ്റുമുട്ടിയത്. റിലീസായി 11 ദിവസം പിന്നിടുമ്പോൾ ഇന്ത്യൻ ബോക്‌സോഫിസ് കീഴടക്കിയത് ഇതില്‍ ആരെന്ന് തിരയുകയാണ് ആരാധകർ. പ്രേക്ഷകർക്കിടയില്‍ വൻ ഹൈപ്പില്‍ എത്തിയ ചിത്രങ്ങളായിരുന്നു ക്രിസ്റ്റഫർ നോളന്‍റെ (Christopher Nolan) 'ഓപ്പൺഹൈമറും' ഗ്രെറ്റ ഗെർവിഗിന്‍റെ (Greta Gerwig) 'ബാർബി'യും.
ഒരേ ദിവസം റിലീസ് ചെയ്‌തതിനാൽ ഈ വർഷത്തെ ഏറ്റവും വലിയ ഹോളിവുഡ് ബോക്‌സോഫിസ് ഏറ്റുമുട്ടലാണ് ജൂലൈ 21 ന് നടന്നത്. ലോകമെമ്പാടുമുള്ള പ്രേക്ഷകരിൽ നിന്ന് മികച്ച അഭിപ്രായം നേടിയ രണ്ട് ചിത്രങ്ങളും ബോക്‌സോഫിസിലും ഗംഭീര പ്രകടനമാണ് കാഴ്‌ചവയ്‌ക്കുന്നത്. എന്നിരുന്നാലും, ഇന്ത്യൻ ബോക്‌സോഫിസിൽ, കലക്ഷന്‍റെ കാര്യത്തില്‍ 'ബാർബി'യേക്കാൾ ഒരുപടി മുന്നിലാണ് 'ഓപ്പൺഹൈമർ'.
കലക്ഷനിൽ ഇരു ചിത്രങ്ങളും തമ്മിലുള്ള അന്തരം വളരെ വലുതാണ് എന്നാണ് കണക്കുകൾ വ്യക്തമാക്കുന്നത്. സാക്‌നിൽക് ഡോട് കോമിന്‍റെ ഒരു റിപ്പോർട്ട് പ്രകാരം, മാർഗോട്ട് റോബി-റയാൻ ഗോസ്ലിങ് അഭിനയിച്ച 'ബാർബി' തിങ്കളാഴ്‌ച (ജൂലൈ 31) ഏകദേശം 85 ലക്ഷം രൂപയാണ് നേടിയത്. നിലവിൽ 36.10 കോടി രൂപയാണ് ഇന്ത്യയിൽ നിന്നുള്ള ചിത്രത്തിന്‍റെ ആകെ കലക്ഷൻ. തിങ്കളാഴ്‌ച സിനിമയുടെ ആകെ ഒക്യുപെൻസി 16.50% ആയിരുന്നു. മറുവശത്ത്, സിലിയൻ മർഫി അഭിനയിച്ച ഓപ്പൺഹൈമറിന് 11-ാം ദിവസം 3 കോടി രൂപ നേടാനായി.