ഹൈദരാബാദ്: അമ്മയും സൂപ്പർ താരവുമായ ശ്രീദേവിയെ അനുസ്‌മരിച്ച് ബോളിവുഡ് താരം ജാൻവി കപൂറിന്‍റെ ഹൃദയഭേദകമായ കുറിപ്പ്. 'അമ്മയെ ഞാനിപ്പോഴും എല്ലായിടത്തും തിരയുന്നു, ഞാനിപ്പോഴും അമ്മക്ക് അഭിമാനമുണ്ടാക്കുന്ന കാര്യങ്ങളാണ് ചെയ്യുന്നത് എന്ന് വിശ്വസിക്കട്ടെ, ഞാൻ എന്ത് ചെയ്‌താലും അത് അമ്മയിൽ തുടങ്ങി അമ്മയിൽ അവസാനിക്കുന്നു' എന്ന അടിക്കുറിപ്പോടെ ശ്രീദേവിയുമായി നിൽക്കുന്ന ചിത്രമാണ് ജാൻവി കപൂർ തന്‍റെ ഇൻസ്‌റ്റാഗ്രാം അക്കൗണ്ടിൽ പങ്കുവച്ചിരിക്കുന്നത്. പോസ്റ്റ് പങ്കിട്ടതിന് തൊട്ടുപിന്നാലെ മനീഷ് മൽഹോത്ര, ഭൂമി പട്‌നേക്കർ, താഹിറ കശ്യപ്, സഞ്ജയ് കപൂർ തുടങ്ങിയ സെലിബ്രിറ്റികൾ ഇൻസ്‌റ്റഗ്രാം പോസ്‌റ്റിൽ ആശ്വാസ വചനങ്ങളുമായി എത്തിയിരുന്നു.
ശ്രീദേവി മരിക്കുന്നതിന് മാസങ്ങൾക്ക് മുമ്പ് ഗോവയിൽ നടന്ന ഇന്‍റർനാഷണൽ ഫിലിം ഫെസ്‌റ്റിവൽ ഓഫ് ഇന്ത്യയുടെ 48-ാമത് എഡിഷനിൽ നിന്നുള്ളതാണ് ജാൻവി പങ്കിട്ട അമ്മയ്‌ക്കൊപ്പമുള്ള ചിത്രം. ഫെബ്രുവരി 24ന് ശ്രീദേവിയുടെ വിയോഗത്തിന് അഞ്ച് വർഷം തികയുകയാണ്. ദുബായിലെ ജുമൈറ എമിറേറ്റ്‌സ് ടവേഴ്‌സിലെ ഹോട്ടൽ മുറിയിലെ കുളിമുറിയിൽ വച്ചായിരുന്നു താരത്തിന്‍റെ അന്ത്യം.