ഇടുക്കി: ചിന്നക്കനാല്‍ 301 കോളനിയില്‍ വീടിനോട് ചേര്‍ന്ന് തുടലില്‍ കെട്ടി തൂക്കിയ നിലയില്‍ യുവാവിന്‍റെ കത്തി കരിഞ്ഞ മൃതദേഹം കണ്ടെത്തിയ സംഭവത്തില്‍ ദുരൂഹതയില്ലെന്നും ആത്മഹത്യയെന്നും പൊലീസ്. കോളനി സ്വദേശി തരുണിനെയാണ് (23) വെള്ളിയാഴ്‌ച വെെകുന്നേരം 6ന് മരിച്ച നിലയില്‍ കണ്ടെത്തിയത്. തരുണിന്‍റെ വീട്ടില്‍ ഫോറന്‍സിക് വിദഗ്‌ധരും ഡോഗ് സ്ക്വാഡും പരിശോധന നടത്തിയെങ്കിലും സംശയത്തിനിടയാക്കുന്ന തെളിവുകളൊന്നും ലഭിച്ചില്ല.
ഞായറാഴ്‌ച ഉച്ചയോടെ തരുണിന്‍റെ മൃതദേഹം ഇടുക്കി മെഡിക്കല്‍ കോളജില്‍ പോസ്റ്റ്‌മോര്‍ട്ടം നടത്തി ബന്ധുക്കള്‍ക്ക് വിട്ടു നല്‍കി. വെെകുന്നേരത്തോടെ അടിമാലിയിലെ വെെദ്യുത ശ്‌മശാനത്തില്‍ സംസ്‌കാരം നടത്തി. തരുണിന്‍റെ ദേഹത്ത് തീപ്പൊള്ളലേറ്റ മുറിവുകളല്ലാതെ പിടിവലിയുണ്ടായതിന്‍റെ ലക്ഷണം ഇല്ലെന്നാണ് പോസ്റ്റ്‌മോര്‍ട്ടം നടത്തിയ ഡോക്‌ടര്‍ പൊലീസിനോട് പറഞ്ഞത്. ശരീരത്തിലും തലയിലും തീപ്പൊള്ളലേറ്റതാണ് മരണ കാരണം.