തെലങ്കാന :വികാരാബാദ് ജില്ലയിലെ ഗ്രാമത്തിൽ 16 വയസുകാരിയെ കൊല്ലപ്പെട്ട നിലയില്‍ കണ്ടെത്തി. കുട്ടിയെ ബലാത്സംഗം ചെയ്ത് കൊലപ്പെടുത്തിയതാകാമെന്നാണ് പൊലീസിന്‍റെ പ്രാഥമിക നിഗമനം. കേസില്‍ കുട്ടിയുടെ പരിചയക്കാരന്‍ അടക്കം നാല് പേരെ പൊലീസ് അറസ്റ്റ് ചെയ്തു.
കാവലി മഹേന്ദ്രയെന്ന് പേരുള്ള ഒരാളേയും മറ്റ് മൂന്ന് യുവാക്കളെയുമാണ് പിടികൂടിയത്. പരിചയക്കാരനായ മഹേന്ദ്ര പെൺകുട്ടിയെ കൊലപ്പെടുത്തിയെന്നാണ് നിഗമനം. മഹേന്ദ്ര പ്രദേശത്ത് പുതിയ വീട് പണിയുന്നുണ്ട്. ഇവിടേക്ക് തന്‍റെ സുഹൃത്തുക്കളെ ഞായറാഴ്ച അത്താഴത്തിന് ക്ഷണിച്ചിരുന്നു.
തിങ്കളാഴ്ച പുലർച്ചെയാണ് മഹേന്ദ്ര കുട്ടിയെ വിജനമായ സ്ഥലത്ത് എത്തിച്ചതെന്നാണ് പൊലീസ് നിഗമനം. കൂട്ടബലാത്സംഗമാണോ അതോ മഹേന്ദ്ര മാത്രമാണോ കുറ്റം ചെയ്തത് എന്നും പൊലീസ് അന്വേഷിക്കുന്നുണ്ട്. അഡീഷണൽ എസ്.പി റഷീദിന്റെ നേതൃത്വത്തിലാണ് അന്വേഷണം പുരോഗമിക്കുന്നത്.