മലപ്പുറം: അരീക്കോട് മുന്‍ തഹസിൽദാരെ മണൽ ലോറി ഇടിച്ച് കൊലപ്പെടുത്താൻ ശ്രമിച്ച കേസിലെ രണ്ടാം പ്രതി പതിനഞ്ച് വര്‍ഷത്തിന് ശേഷം അറസ്റ്റില്‍. കോഴിക്കോട് പെരിങ്ങളം സ്വദേശി പുള്ളത്ത് കണ്ടി നൗഫലാണ് (45) പിടിയിലായത്. വെള്ളിയാഴ്‌ച ബാലുശ്ശേരിയില്‍ വെച്ചാണ് ഇയാള്‍ അറസ്റ്റിലായത്.
2007ലാണ് കേസിനാസ്‌പദമായ സംഭവം. അനധികൃത മണല്‍ കടത്തിനിടെ പത്തനാപുരം പള്ളിപ്പടിയിൽ വെച്ച് ലോറി പിടികൂടാന്‍ ശ്രമിക്കുമ്പോഴാണ് തഹസില്‍ദാരെയും ഒപ്പമുണ്ടായിരുന്ന ഉദ്യോഗസ്ഥരെ ഇടിച്ച് കൊലപ്പെടുത്താന്‍ ശ്രമിച്ചത്. സംഭവത്തെ തുടര്‍ന്ന് ഇയാള്‍ ഒളിവില്‍ പോവുകയും നിലവിലെ അഡ്രസ് മാറ്റി വിവിധയിടങ്ങളില്‍ മാറി താമസിക്കുകയുമായിരുന്നു.