പനജി: ബിജെപി നേതാവും ചലച്ചിത്ര താരവുമായ സോണാലി ഫോഗട്ടിന്‍റെ കൊലപാതകവുമായി ബന്ധപ്പെട്ട് രണ്ട് പ്രതികളെ ജുഡീഷ്യല്‍ കസ്റ്റഡിയില് വിട്ടു. പ്രതികളായ സുധീർ സാങ്‌വാന്‍, സുഖ്‌വീന്ദര്‍ സിങ് എന്നിവരെയാണ് 13 ദിവസത്തേക്ക് കോടതി കസ്റ്റഡിയില് വിട്ടത്. പൊലീസിന്‍റെ ചോദ്യം ചെയ്യലിന് ശേഷം ശനിയാഴ്‌ചയാണ് ഗോവയിലെ മാപുസ ജുഡീഷ്യല്‍ മജിസ്‌ട്രേറ്റ് ഫസ്റ്റ് ക്ലാസ് കോടതി പ്രതികളെ കസ്റ്റഡിയില് വിട്ടത്.
ഓഗസ്റ്റ് 23നാണ് നോർത്ത് ഗോവ ജില്ലയിലെ അഞ്‌ജുനയിലെ ആശുപത്രിയില്‍ വച്ച് 42കാരിയായ സോണാലി ഫോഗട്ട് മരിച്ചത്. മരണത്തില്‍ ദുരൂഹതയുണ്ടെന്ന് കുടുംബം അറിയിച്ചതോടെയാണ് പൊലീസ് അന്വേഷണം ശക്തമാക്കിയത്. അമിതമായ ലഹരി ശരീരത്തില്‍ കലര്‍ന്നതാണ് സോണാലിയുടെ മരണത്തിന് കാരണമെന്ന് അന്വേഷണത്തില്‍ കണ്ടെത്തി.