പാലക്കാട് : കാറിന്‍റെ രഹസ്യ അറയില്‍ ഒളിപ്പിച്ച് കടത്തിയ 173 കിലോഗ്രാം ചന്ദനവുമായി രണ്ട് പേര്‍ പിടിയില്‍. പട്ടാമ്പി വല്ലാപ്പുഴ സ്വദേശികളായ എച്ച് അനസ് (24), യു മുഹമ്മദ് ഉനൈസ് (20) എന്നിവരെയാണ് എക്‌സൈസ് സംഘം പിടികൂടിയത്. വാളയാര്‍ ടോള്‍ പ്ലാസയ്‌ക്ക് സമീപം വാഹനപരിശോധനയ്‌ക്കിടെ എക്‌സൈസ് ഉദ്യോഗസ്ഥരെ വെട്ടിച്ചുപോയ കാറിനെ കിലോമീറ്ററോളം പിന്തുടര്‍ന്ന് കഞ്ചിക്കോട് ആലാമരത്ത് വച്ചാണ് പിടിച്ചത്.
കാര്‍ ഉപേക്ഷിച്ച് പുഴയില്‍ ചാടി രക്ഷപ്പെടാന്‍ ശ്രമിച്ച പ്രതികളെ സാഹസികമായാണ് എക്‌സെസ് സംഘം പിടികൂടിയത്. തുടര്‍ന്ന് കാറില്‍ നടത്തിയ പരിശോധനയില്‍ പിന്‍വശത്തെ സീറ്റിനടിയില്‍ ഒളിപ്പിച്ച നിലയില്‍ ചന്ദനമുട്ടികള്‍ കണ്ടെത്തി. ആറടി നീളവും മൂന്നടി വീതിയുമുള്ള രഹസ്യ അറയാണ് കാറിലുണ്ടായിരുന്നത്.